Red Bull Rookie Cup ; Pakhatna Hruaizela Spain-ah Mizo rider a kal dawn

JK Tyre - FMSCI Na­tio­nal Racing Cham­pion­ship vawi 20-na chu tun kartawp khan Kari Motor Speedway, Coimbatore-ah neih a ni a, Red Bull Rookie Cup third round tlan zawh a nih hnuin Lalhruaizela chuan point 58 hmuin pakhatna a ni. Bawngkawn rawlthar Hruaizela hi Spain-a neih tur Red Bull MotoGP Rookies Cup-a inlan turin qualifying tlan tura thlan a ni nghal.

September 2-4 khan inelna hi neih a ni a, round khatah intlansiak pahnih a awm ṭhin. Inrinnia intliansiak hmasa zawk, kum 12-16 intlansiakna Red Bull Rookie Cup-ah Lalhruaizela pahnihna niin a hnungah Electric veng rawlthar K Lalnunsanga a thleng ve bawk. Round hmasa pahnih neih tawh aṭangin Mizo rider te hi table hmahruaitu an nih avangin an hmahruaina an sawh nghet - an ke lehlamin Spain an rap a ni ber tawh.

Nimin khan intlansiak hnuhnung ber neih leh a ni a, kum 2003-a siam circuit, 2.1km a thui tlankawngah rider-te an inel tawk hlawm hle. Lalnunsanga'n bul ṭan fuhin lap thum hma a hruai. Chumi hnuah Hruaizel-a'n a pel a, Mizo rider pahnih hnungah hian Jaden Gunawardena leh Chennai rider Varoon S te an inum tawk hle bawk.

Lap riat an tlan zawh meuh chuan Jaden hian a hma lama awm rider pahnih tlanpelin pakhatna dinhmun a rawn luah, Hruaizela chu second thum velin a pel hman. Round 1 aṭang a tawp thlengin Jaden hian pa­khatna dinhmun a luah fai vek. Mahse, Sri Lanka rider Jaden hi Red Bull Cup tlan tura tling sa a nih avangin point pek a ni ve ngai lo, hei vang hian Mizo rawlthar Hruaizela hi table-ah pakhatna a ni.

Engtin zel?

Bawngkawn rawlthar Hruaizela hi Spain-a neih tur Red Bull Roo­kies Cup-a inlan turin qualifying a tlan dawn. Red Bull MotoGP Rookies Cup hi 250cc class niin MotoGP nena thlunzawm a nih tawh avangin European leg zawng zawngah an tlan ve vek dawn a ni.

JK Tyre - FMSCI Na­tional Racing Cham­pionship-ah hian bike bakah car intlansiak neih tel a ni. Bike intlansiak pakhat zawk Gixxer Cup-ah Mizo rider pahnih Mal­sawm­dawngliana leh Lalmawipuia te an inlan bawk.

National champion nih tuma inelnaah Kanan Veng rawlthar Mal­sawm­dawngliana hi pahnihna niin a hnung chiahah Bawngkawn rider Lalmawipuia a thleng bawk. Nihnihnaah Malsawmdawngliana hi pakhatna a ni a, Lal­mawipuia erawh pasa­rih­naah a thleng thung.

Suzuki Gixxer Cup huangah hian champion chuan Suzuki Gixxer SF a dawng dawn a, pa­hnihna tan Gixxer Naked niin pathumna chuan Scooter Lets a dawng thung dawn - Gixxer Cup bik hi November 17-18 hian Buddh International Circuit, Noida-ah neih leh tura a ni.

MiMSA an lawm

Mizoram Motosports Association (MiMSA) president Vanlalmuana chuan, "Tualchhung rider ten inzirna tur hmun an neih theih nana Tuirial airfield min hman tirtu sorkar chungah kan lawm a, sum leh pai, tha leh zung min sen saktu MSSC, CK Huyndai, LBS Suzuki, D-3 Bu­siness Enterprise, MS Bajaj National Business Enterprise te chungah lawmthu kan sawi takzet," tiin Vanglaini a hrilh.

Mizoram team ma­nager Muante-a chuan sawi zawmin, "Rider te anmahni thu ngawtin an tel thei lo a, inelna an hmachhawn theih nana phalna petu an nu leh pate chungah lawmthu kan sawi. Hmabak kan la ngah hle a, a bul kan ṭan chhoh tawh avangin a tawp thlengin theihtawp kan chhuah zel dawn a ni," a ti. Hlawhtlinna an chan chhoh theih chhan chu Pathian a nih thu a sawi bawk.