England hmalam hriat zan

FIFA World Cup qualifier-ah zanin dar 12:15 hian England-in Group F-a anmahni hnaih bertu Slovakia chu Wembley Stadium-ah an mikhual dawn a, Sony Ten 2-ah live-a pekchhuah tur a ni.

England hian Sep­tember 1, Zirtawp zan khan point la hmu lo awmchhun Malta chu 4-0 in an sawp a, amaherawhchu first half-ah goal an khung lo.

Three Lions tan hian August thlaa Premier League-a goal la khung ngai lo Harry Kane-a'n minute 53-naah goal hmahruai a khung. Eng­land hian ram te nau Malta lakah goal dang khung belh an harsat a, Southampton wing back Ryan Bertrand chuan minute 85-naah ram tana a goal hmasa ber a khung a, injury time-ah Arsenal forward Danny Welbeck leh Tottenham Hotspur forward Kane ten goal khat ve ve an khung belh leh bawk.

Zanina inkhel hma­chhawn tur Slovakia hian an mualah Slovenia chu Miha Mevlja-a'n a lama tihluh zarah an khung hram. Slovakia hi goal khat chauhin chak mah se point thum tho a hlawhchhuah avangin hmahruaitu England nena an inthlauhna chu point hnih chauh a ni.

Gareth Southgate-a enkawl England tan World Cup khel pha turin Slovakia an hneh a ṭul a, an chak lo erawh chuan playoff an khelh phah thei bawk. Malta an hneh ṭumin Manchester City forward Raheem Sterling a khel ṭha lo a, Liverpool player hlui thlaktu United forward Marcus Rashford erawh a khel ṭha hle.

Kum 19 mi Rashford-a'n match pawimawhah rin a hlawh thei a, inghahna tak tur erawh Tottenham duo Kane leh Dele Alli te an ni a. Malta laka fiahna hmachhawn lo goalkeeper Joe Hart-a'n Slovakia lakah fiahna hau tak zawk a hmachhawn bawk ang.