Reds-in Barca puhna an pha

Liverpool chuan Barcelona-in Philippe Coutinho manah pound maktaduai 183 an phut nia an puhna chu an pha a, Coutinho zawrhlai a nih loh thu an sawinaah khan an din reng thu an sawi. Barcelona director Albert Soler chuan Spanish football transfer tawp niah Reds chuan Coutinho an hralh phalna zat an hrilh niin an sawi a, Liverpool chuan hei hi an pha a ni.

Nipui transfer-ah Barcelona hian ṭum thum ngawt Coutinho an dawr a, mah se Liverpool-in an player chhuanvawr chu zawrhlai a nih loh thua chhangin Barca dawrna hi an hnar fai vek. Liverpool chuan, "Barcelona thusawi hi thu dik lo hulhual a ni," tiin Catalan club thusawi chu an pha.

Soler hian Inrinni khan press conference-ah, "Liverpool hian pound maktaduai 183 an phut a, mah se kan pawm thei lo. Coutinho-a'n kan club-a a khelh duh vanga theihtawp a chhuah avangin kan lawm a, mah se engmah tih theih kan nei si lo a ni," a ti.

Barcelona hian Paris St-Ger­main hnena pound maktaduai 200-a Neymar an hralh hnuah Coutinho an rim nghal chat a, mah se pound maktaduai 72, 90 leh 114-a Liverpool an dawrna chu Mer­seyside club hian an hnar vek. Season hmasaa Reds tana goal 14 khungtu Coutinho hian January khan Reds-ah kum nga dang cham turin contract a ziak a, release clause a neih loh avangin Barca tan Reds phal lo chung lakchhuah theih a ni lo.

August 12 khan Coutinho hian Liverpool hnenah hian chhuah dilna e-mail hmangin a thehlut a, mah se Reds hian chhuah an phal chuang lo. A hnungzang na avangin Brazilian forward hian Liverpool tan tun season-ah a hmel a la lan lo a, Brazil tan World Cup qualifier-ah goal a khung leh lawi si.

Soler chuan pound maktaduai 182-a Coutinho an lei loh chhan chu dinhmun hlauhawma an club dintir an duh loh vang niin a sawi a, Borussia Dortmund aṭanga forward Ousmane Dembele chu pound maktaduai 135.5-a an lei tawh avangin UEFA Financial Fair Play hnuaiah hremna an hmachhawn theih an hlau - he thusawi zawng zawng hi Liverpool chuan 'dawt' ah an puh thung.