Chhinga Veng an kal fawr zel

Mizoram Premier League Season 6 ṭan hmaa inelna pa­hnih MFA Super Cup leh I Day Football nomawi chawitu Chhinga Vengin coach Lal­sangzuala Hmar hnuaia an match hmasa berah Mizoram Police 4-1 in an sawp.

Zirtawpni zan Lammual inkhelah hian F. Lalrinpuia hmangin Police-in hma hruai mah se Chhingcows-in Malsawmfela goal hnih bakah Laldampuia leh R. Malsawmtluanga te goal hmangin an chhanglet. Chhinga Veng hian coach Sanga kaihhruaina hnuaiah match 14 khel tawhin an la chak vek.

Bul ṭan ṭha Police

Mizoram Police-in nung takin bul an ṭan a, midfield laia hrem vanga khel thei lo V. Lalṭanpuia aia lut Lalbiaknunga chu team khaipa nih tling khawpin a khel ṭha. Police goal nawr a nat avangin Chhinga Veng an talbuai a, minute 20-naah Republic Veng tlangval F. Lal­rinpuia hmangin hma an hruai a, Ṭialthawnga hoten bul an ṭan ṭha.

Amaherawhchu Police-in goal nawr chhunzawm an tum luatah an tlarhnung a pawp phah a, Chhinga Veng tlarhmaa awm MS Dawngliana leh Dampuia ten goal chance an neih hnuah pawh Police lamin tlarhnung an thuam ṭhat phah lo. Season liam taa first division-a khel Police-in game plan B an neih loh an tuar zui bawk.

Chhinga Veng nge nge

Season liam taa MPL top scorer Dampuia'n minute 39-naah Sawmfela ball pek chu a ke dinglamin mawi zetin keeper Lalṭanpuia vei lam kilah kual raihin a khung a, Chhingcows an hawi let tawh lo.

First half tawp hma chiahin Dampuia'n a goal khung tur siam saktu Sawmfela siamsak letin Ramhlun South tlangval hian hmahruaina goal a khung. Second half-ah Chhinga Veng an chungnung zui a, minute 67-naah Dampuia cross chu MS-a'n a tauh goal.

Darlawn tlangval MS-a hian a lu hmangin a khung ngai meuh lo a, amaherawhchu Chhinga Veng mid­fielder hian a ke vei lam erawh a hmang thiam tih a lantir fo a, Police laka inkhel an thunun theih nan pawh hian midfield-a ball semtu ber a ni. Injury time-ah MS-a freekick pet chu Sawmfela'n a tauh goal a, Chhinga Vengin goal li an khung.

Engtin zel?

Chhingcows hian I Day Foot­ball-a 5-2 zet an sawp Mizoram Police chu 4-1 in an sawp nawn a, harsatna nei loa goal an khung reng avangin champion rinkai an la ni chhunzawm zel.

Chutihrualin Chhinga Veng hian match sarih chhung a zawnin clean sheet an nei tawh lo a, an tlarhnung erawh an enfiah a ṭul thung.

CVFC hian September 8, Zirtawp tlaiah MFA Super Cup final-a an hneh tawh Chanmari West an hmachhawn ang a, hemi hma tlai hian Mizoram Police-in point thum hmu tawh Be­thlehem Vengthlang an hma­chhawn ve bawk ang.