Futsal-ah MFA an fir dawn

Mizoram Football Association Futsal Committee chuan Inrinni khan Futsal Referee Workshop, Rajiv Gandhi Stadium, Aizawlah an buatsaih.

Mizoram chhunga football-a thuneitu sang ber MFA chuan an hnuaia registered player chungah fir takin dan a lekkawh dawn a, MFA hriatpui ni lo inelna hmachhawn player-te chungah hremna na tak an lekkawh tur thu an tichiang bawk.

Futsal Referee Workshop-ah hian tun hnaia New Delhi-a AFC Futsal Workshop-a kal referee pahnih Lalthangliana leh Lalhriatliana te bakah MFA technical officer Danny Lalduhawma ten kal khawm­te an zirtir.

MFA hnuaia club affiliation ti thar club 34 aiawh mi 74 an tel a, Futsal-a FIFA dan an zir a, practical-in an zir zui nghal a ni.

AIFF chuan November chhung hian Mizoramah AFC Futsal Level 1 Coaching Course an buatsaih dawn a, MFA hian Futsal hi lian taka kalpui tumin ruahmanna hrang hrang a siam mek a ni.

September 19 aṭangin MFA Futsal League-a khel tur zawnna Playoff buatsaih a ni dawn a, January 2018 aṭangin MFA Futsal League khelh ṭan a ni ang.

MFA honorary secretary Lal­nghinglova Hmar chuan, "Futsal hi AIFF ruahmanna angin kan kalpui dawn a, an duhsakna dawngin India rama Futsal Coaching Course hmasa ber chu November-ah hian kan thlen theih kan beisei. India rama futsal kalpuitu ṭha ber nih tumin ṭan kan la dawn a ni," tiin a sawi.