Thlawpna duhtu Mesut Ozil
Arsenal midfielder Mesut Ozil chuan sawiselna leh demna ringawt ai chuan hma a sawn theih nan amah thlawp turin ama chanchin sawi ṭhintute a ngen.
Kum 28 mi Ozil hian Arsenal a zawmin Gunners player manto ber a ni a, a hlawh a sang fal hle bawk. Real Madrid aṭanga Gunners zawmtu hian khelmual chhungah a theihna lantir ṭhin mah se amahah beiseina a san em avangin an club-in result an neih ṭhat loh chuan sawisel hlawh berte zinga mi a ni ṭhin.
Germany international Ozil chuan, "London-a ka hun hman chungchang an sawina hi chu mimal tak chuan ka pawm thei vek. Manto lutuk, tharum ngah tawk lo leh mahni hmasial tih te chu min sawi ṭhin dan a ni. Ka chanchin sawitu ṭhenkhat hi chuan min hre chiang a, ṭhenkhat erawh chuan hre lem loin an sawi ve mai bawk. Club legend ten an player hetiang tak maia an sawi chiam ṭhin hi ka hre tam lo. Player kan nih vangin sawiselna chu kan tawng tur a ni a, chutih rualin Gunners player hluite hi min sawisel ringawt loa min thlawp zawk turin thurawn ka pe a ni," tiin a sawi.
La Liga champion Real Madrid aṭanga Arsenal zawm tura sawm luttu Arsene Wenger nena an sulhnu chungchang sawi zuiin Ozil chuan, "Kum li hun kan hman dun chhungin thil ṭha tam tak kan ti ve bawk. He club-in FA Cup nomawi 13 a chawi zinga pathum chu tun hnai kum li chhunga chawi a ni a, a dang 10 kha tun hma kum 75 chhunga an hlawh chhuah a ni, hei bakah hian Community Shield pathum kan la bawk," tiin amah sawisel ṭhin tute chu an nomawi chawi zat en sak turin a chah.
Ozil hian Arsenal chu club ropui leh player ṭha tak tak awmna a nih avangin hun rei zawk a cham chhunzawm theih a beisei thu a sawi lang tel bawk.