World Cup Qualifier Italy lakah Spain an chungnung

Real Madrid forward Isco chuan Spain tan goal hnih a khung a, an mikhual Italy lakah 3-0 in an ram team hi hnehna a chanpui - Spain tan World Cup 2018 khel turin kalkawng a awlsam sawt a, Italy tan playoff chu 'beiseina beiseiawm' zawk a ni ta.

Group G-a inkhelah hian Spain tan Alvaro Morata chuan goal khat a khung ve bawk a, Chelsea ṭantu ten an striker thar chet ṭhat chhunzawm zel hi hmuh nuam an ti khawp ang - Italy tan kum 2006 hnua qualifier-a tlawm hmel an hmuh hmasak ber a ni nghal bawk.

Inkhel chu

Santiago Bernabeu-a in­khelah ṭan aṭanga minute 13-na lekah Isco-a'n Spain tan free kick a pet a, ṭha zetin goal-ah a chantir. Real forward-in a khelmual hman thiamah goal dang khung turin hun a duh rei lo. Minute 40-naah an goal hnihna a khung chhunzawm a, Spain-a inkhelah Italy an hawihai.

Goal dang lut loin hun rei tak hman a ni a, minute 72-naah Morata tlan luhtir a ni. Pound maktaduai 60 man striker hian a khelmual hman thiam hluiah 'a la tlangnel reng' tih pholangin minute nga chiah hun a hmang hman tihah goal a khung nghal a, chak tur a chiang. Spain tan hun tawp dawnah David Villa inlan tir a ni a, kum 2014 hnua ram tana a inlan hmasak ber a ni.

Italy dinhmun?

Europe aṭangin ram 13 chiahin World Cup-ah hmun ruak an nei dawn. World Cup qualifier hi Group A - I ah in-

ṭhen hran niin group hma­hruaitu ṭheuh chu khel tura tling chiang tur an ni a, group tina pahnihna zinga a ti ṭha pa­riatin playoff an khel leh dawn.

Group G-ah Italy hi pa­hnihna niin Spain an phak lohna chu point thum a ni. Match hmabak an neih pathumah Israel, Macedonia leh Albania an khelhpui dawn avangin hnehna an chan vek beiseiawm mah se Spain hmabak match thum a hautak bik lo a, goal difference-ah an inthlauh bawk si avangin Italy-in playoff an khelh a rinawm ta hle.

Lopetegui thukhawchang

Spain coach Julen Lopetegui chuan Isco fakin, "Match ropui takabul ṭantu a ni a, game kan thunun theih nana bul ṭantu a ni. Goal ropui tak pahnih a khung a, boruak sang tak hnuaiah a talbuai lo," tiin a player a fak hle.

Lopetegui chuan, "Kan inringtawk a, rilru paukhauh tak nei chungin harsatna kara dinchhuah dan kan hria a ni. Vawiina kan result avang hian ka lawm a, Italy hnehtu kan ni," tiin team ṭha tak lakah hnehna an chan thu a sawi bawk.