ATK keeper thar Jaaskelainen
Atletico de Kolkata chuan Premier League goalkeeper zinga hriat hlawh ber pawl Jussi Jaaskelainen an lalut. Kum 42 mi keeper hian season hman zawh takah khan Championship club Wigan Athletic tan a la khel a, ATK tan a la chhaw tlak khawp ang.
Finland tana vawi 56 inlan tawh keeper hian kum 1997 khan Bolton Wanderers a zawm a, khawvel hriat a hlawh ṭan. Bolton-ah hian season 15 chamin match 530 a khel a, he club tana match khel hnem pathumnna dinhmun hial a luah phak. May 2007 khan Bolton chu an club chanchina a vawi hnih nan UEFA Cup-ah an inhlankaipui a, club Player of the Year Award leh 'Players' Player of the Year Award' hial a dawng.
Kum 2012-a Premier League 20 Seasons Awards sem a nih ṭumin October 20, 2001-a Manchester United nen an inkhelh ṭuma Jaaskelainen-a'n double save a neih chu Premier League season 20 neih a nih chhunga Premier League save ṭha pathumna a ni phak.
Kum 2011-12 season khan Bolton chu Premier League aṭangin an tla thla a, Jaaskelainen hi contract thar zawrh ni mah se a hnar. West Ham a zawm a, season thum a cham hnuah 2015-16 season khan League One club Wigan Athletic a zawm a, champion nomawi a chawipui. Season hmasaa Championship an khelh hnuah India lam pan a thlang ta a ni.
Kolkata club hian season hmasaa Chennai City central midfielder Darren Caldeira leh season hmasaa Chennaiyin FC tana khel left back Nallapan Mohanra an lalut bawk.