Number 1 Pliskova chak hram
Hmeichhe world number 1 Karolina Pliskova chuan harsa takin US Open third round a paltlang hram. Kartawp inkhel dangah French Open champion Jelena Ostapenko erawh a chak lo thung.
Inrinni zan Arthur Ashe Stadium-a inkhelah seeded pakhatna Pliskova hian world number 26 Shaui Zhang chu 3-6, 7-5, 6-4 in a hneh hram. Chinese nula Zhang hian set hnihnaah 5-4 a hma a hruai laiin match point a hmu hman a, mahse Pliskova hian a pawtthla thei a ni.
Czech Republic nula Pliskova chuan, "Set hnihnaah hliam tenau ka nei a, hartsatna lian tham min thlen lo hlauh. Kan inkhelh lai khan ka inhliam belh ang tih ka hlauthawng deuh a, mahse buaina liantham tawng loa ka tlingtla thei kha ka lawm hle," tiin a sawi.
Hmeichhe player zingah world number 1 ni thei pathum an la dam mek, Elina Svitolina leh Garbine Muguruza te hian nomawi an chawi a nih chuan Pliskova lehpelin ranking-ah a chung ber dinhmun an luah thei dawn a ni.
Inkhel dangah Latvian rawlthar Ostapenko chu world number 38 Daria Kasatkina lakah 6-3, 6-2 in a chak lo a, khawtual nula Coco Vandeweghe chuan 7-5, 4-6, 6-4 in seeded 10-na Agnieszka Radwanska a hneh bawk. Lucie Safarova pawhin Japan nula Kurumi Nara chu 6-3, 6-2 in a hneh ve bawk.