England & Liverpool tan chanchin ṭha Hendo a dam
Liverpool captain Jordan Henderson chu hliam vanga England squad-a telh a nih loh zet hnuah, Kalvin Phillips inhnuhdawh avangin Three Lions squad-ah telh a ni a, a malpui hliam a dam tawh.
Reds-in August thla tawpa 2-1 a Newcastle United an hneh ṭum khan Hendo hi hliam vangin lakchhuah a ngai a, Merseyside club tan inlan thei loin a awm zui.
Mahse, English midfielder hian dam lam a pan leh tawh a, Liverpool chuan tun kar chhungin training pangngai a neih leh theih tawh tur thu an sawi - England-in an ko nghal.
A danglam
England boss Gareth Southgate-a'n kar hmasa khan Nations League-a Italy (September 23) leh Germany (September 26) hmachhawn tur squad a puang a, Manchester City tana khel phak lo Kalvin Phillips chu squad-ah telh a ni.
Mahse, kum 26 mi midfielder hi a dar hliam avangin a inhnukdawk zui a, a hmun ruak luah turin hliam damkawr Hendo koh a ni - international break zawha Reds-in fixture an neih dante thlir chuan, Jurgen Klopp a lawm kherin a rinawm loh.
Tun ṭum Three Lions sqaud timaktu pakhat chu Manchester United-a hmun chang phak lo Harry Maguire leh Luke Shaw te koh an ni hi a ni a, anni pahnih hian tun season-ah league match hnihah ve ve chiah bul an la ṭan a ni.
Koh loh
Maguire leh Shaw te koh an nih laiin tun season-a harhtharna chang Marcus Rashford leh Jadon Sancho erawh koh an ni lo - Rashford hi hliam vangin a inenkawl mek.
Kum 24 mi Rashford hian tun season-ah league match ruk khelin goal thum a khung tawh a, assist vawi hnih a nei bawk. Sancho-a'n tun season inelna hrang hrangah match riat khelin goal thum a khung tawh thung.
England boss Gareth Southgate chuan, "Qatar World Cup squad puang turin kar riat chiah a awm tawh a, minute tin hi a hlu em em vek a ni," a ti a, tun international break-a ram tana koh loh tan chuan rilru hahna tham a tling tawh.
A chhehvel
Arsenal defender Ben White-a'n season hmang ṭha viau mah se Mikel Arteta hnuaiah right back a ni miau a, English centre back tan Three Lions squad-ah hmun a awm tlat lo.
Chelsea midfielder Conor Gallagher hian season hmasa khan Crystal Palace-ah loan-in hun duhawm tak a hmang a, mahse, Blues-ah beisei a phak loh avangin England squad-ah a tel lo bawk.
Chutihrual chuan hliam damkawr Hendo-te koh an ni leh lawi si pawh hi sawisel theih tak chu a ni - a pawimawh ber chu England hian March thlaa Ivory Coast (3-0) an hneh hnuah chak an la nei leh lo a, insiamṭhat an mamawh.