Nations League - League phase hmawr an bawk hnai

UEFA Nations League season thumna league phase chu tun international break-ah hian khelh zawh a ni dawn. Inelna hi friendly match 'u' awrh a nih avangin ngaihhlut a hlawh tawk lo a, football ngainatute pawhin Nations League nghawng ngaihtuah loin kumin November thla aṭanga khelh ṭan tur FIFA World Cup an thlir tawh zawk.

Inelna kalphung
Nations League-ah hian champion an awm ṭhin a, League A aṭang chauhin champion an awm thei. League A group palia ti ṭha berte chuan nakkum June 14-18 hian playoff hmangin champion an zawng ang.

Chutihrualin League A group tina hnuai bera awmte erawh League B-ah an tla dawn a, chutiang chiah chuan League B chung bera awm pawh League A-ah an kai chho dawn. League A aṭanga League D hi a inzawm vek tihna a ni.

League phase bik hi June 1 aṭang khan khelh ṭan a ni a, tun international break hian khelh zawh a ni ang.

Playoff khel tur
Group 1-ah champion lai France awm mah se Les Bleus hian playoff an khel thei tawh lo. Playoff khel turin Denmark dinhmun a ṭha a, Croatia leh Austria ten beisei tur an nei bawk.

Group 2-ah Spain-in pakhatna dinhmun an luah mek a, an hnuaiah Portugal, Czech Republic leh Switzerland te an awm. Spain leh Portugal te inthlauhna hi point khat chauh a ni a, group match hnuhnung berah an inkhel dawn.

Group 3-ah hian Germany, Italy leh England te an awm chungin hmahruaitu chu Hungary an ni daih. Three Lions hian playoff an khel thei tawh lo a, table mawngphahah an awm mek. Gareth Southgate-a hote hian relegate loh an tum dawn a, group match hnuhnung bera an hmelma Germany nena an inkhel tur hian ngaihven a hlawh ang.

Group 4-ah Netherlands leh Belgium te an relegate thei tawh lo a, an pahnih hian playoff khel tur an la zawng dawn. Group match hnuhnung berah Louis van Gaal-a hoten Red Devils hi an mikhual ang. Poland leh Wales te erawhin playoff an khel thei tawh lo a, relegate loh chu an tum ber tur a ni.