Pep leh Klopp te angin Ten Hag-a'n inthunna a keng tel - Fernandes

Portugal international Bruno Fernandes chuan Erik ten Hag chuan Manchester United-ah inthununna a rawn ken tel thu a sawi a, Pep Guardiola leh Jurgen Klopp te ang thoin kal dan bik a neih thu a sawi.

Man United hian April thla khan Ajax aṭanga Ten Hag an lakluh tur thu an puang a, beiseina sang tak nei mah se Brighton & Hove Albion leh Brentford te hneh loin season bul an ṭan. Tunah erawh Man United hi Ten Hag hnuaiah an insiamrem a, league match liah chak zawnin an team hneh zingah Liverpool leh league hmahruai mektu Arsenal an tel.

United vice captain Fernandes chuan, "A hmasa berah chuan tum dan mumal tak a nei a, khelh dan phung bik a nei. A duh dana kan khelh theih nan 'dan' a siam a, khawng takin a kalpui. Team chhungah inthununna khauh takin a kalpui a, chu chu tun hmaa kan neih loh a ni. Player duhsak bik a nei lo a, inang khat vekin min en," tiin manager thar a fak.

Portuguese midfielder chuan chhunzawmin, "Tuna Ten Hag-a kalpui ang hi Pep Guardiola leh Jurgen Klopp ten hun rei tak an kalpui tawh a ni a, hei vang tak hian an club pawh a ngelnghet hle.

"Hmasawnna tur ṭhahnem tak erawh kan la nei a, a duh dana player zawng zawngin khel vek turin hun a la mamawh. Engtik niah emaw chuan a duh dan thlapin kan khelh theih ka beisei. Press conference-ah team ti ṭha thei tur player chauh an lakluh tur thu a sawi a, hei hi team-in kan mamawh chu a ni," tiin a sawi.

Ten Hag hnuaiah kum 28 mi Fernandes hian match riat khel tawhin goal khat leh assist vawi khat a nei tawh. Man United hian October 2-ah an hmelma Manchester City hmachhawn turin Etihad Stadium an tlawh ang.