La Liga-in Vinicius Jr tih elna an dem

Spanish football-a league sang ber, La Liga thuneitute chuan tun hnaia vun rawng inthliarna lam hawia Vinicius Junior tih elna chu an ngai thutak tih an sawi a, thuneitute nen fans che mawi lote man chhuak tura an thawhho tur thu an sawi.

Pathianni zan khan Madrid derby-ah Atletico Madrid leh Real Madrid te an inkhel a, club pahnih an intawn hma hian football agent Pedro Bravo chuan goal a khung zawha, a lawm nana lam ṭhin Real forward Vinicius Junior chu lam lo turin a ti.

Pedro hian, "Spain-ah chuan khingpuite kan zah tur a ni a, zawngte ang maia lam chin hi bansan a ṭul," a ti a, mi tam tak chuan chi inthliarna ṭawngkamah ngaiin an sawisel a, Pedro hian a hnuah ngaihdam dilna social media lamah a ti chhuak.

Atletico Madrid captain Koke chuan, "A lam loh chu a tan a ṭha zawk ang," tiin Brazilian forward hi a lo vau lawk ve bawk a, Vinicius hian goal khung ta chiah lo mah se Rodrygo goal khung lawm nan a lampui.

Wanda Metropolitano stadium-a inkhelah fans ṭhenkhatin Vinicius hi mawi lo takin an au el a, ṭhenkhat chuan vun rawng inthliarna tilang lam hawi naute lem chu Real Madrid kawr hak tirin an pholang bawk.

La Liga thupuangtu chuan, "Khelmual pawn leh chhunga thil thleng ṭhenkhat kha a duhawm lo takzet a, football hi hlim leh nuam ti taka kan lawm ho theih nan club-te nen kan thawk ho reng a ni.

"Inhuatna lam hawi thu hian La Liga-ah hmun a chang ve lo a, chutiang ang thil a lo thleng a nih chuan club leh thuneitute nen, a titu chu hrem an nih ngei theih nan hma kan la ṭhin," a ti a, La Liga hmalakna a puang.