Nagelsmann a dinhmun a him - Bayern president

Bayern Munich president Herber Hainer chuan tun hnaiah result ṭha nei lo mah se manager Julian Nagelsmann-a dinhmun a him thu a sawi. Bavarians hian Champions League-ah Inter Milan leh Barcelona an hneh a, Bundesliga-ah erawh match li chhung chak hmel an hmu tawh lo.

Kar liam ta khan Bayern hian Augsburg 1-0 in an hneh lo a, hemi hma hian Borussia Monchengladbach, Union Berlin leh VfB Stuttgart te nen an inhnehtawk. Bavarians hi an result a ṭhat loh avangin coach Nagelsmann chu chhuak tura sawi thu thang a awm a, Chelsea ban tak Thomas Tuchel chu Nagelsmann thlakna tura sawi rik a ni.

Bavarians president Hainer chuan, "Julian Nagelsmann leh player zawng zawng chungah rinna kan nghat. International break a zo ang a, FC Bayern-in kan theihna zawng zawng kan chhuah leh ang," tiin a sawi. Club CEO Oliver Kahn pawhin, "Coach dang kan ngaihtuah lo. Julian chungah kan rinna zawng zawng kan nghat. Kawng dik kan zawh leh thuai a ṭul a, Bayer Leverkusen kan hmachhawn hunah kan nihna kan lantir a ṭul ang," tiin a sawi ve bawk.

Bayern hian tun nipui bazarah an goal khung khawl Robert Lewandowski an chân a, Polish striker thlak nan Liverpool aṭangin Sadio Mane an lalut. Bavarians hian season bul ṭan ṭha mah se league match hnuhnung paliah chak hmel an hmuh loh avangin match sarih aṭangin point 12 an hmu a, table-ah panganaah an awm mek.