Club thutlukna ka zah ang - Rodgers

Leicester City manager Brendan Rodgers chu ban theih dinhmunah a ding mek a, a chungah eng pawh thleng se club thutlukna a zah tur thu a sawi chhuak - a nihna takah chuan duh thlang thei dinhmunah a ding lo.

Foxes hi Premier League match ruk chhung a zawnin an tlawm, an match hnuhnung berah Tottenham chuan 6-2 teh meuhin an sawp. Match sarih aṭangin point khat chauh an la hmu a, table mawngphah luahtu an ni mek.

A hma hun zawhna chhangin Rodgers chuan, "Ka chungah eng pawh thleng se club thuneitute thutlukna ka pawm tur a ni, a chhan chu an hnen aṭang hian engtik lai pawhin thlawpna ka dawng ṭha ṭhin.

"Kan inkhel tawh ho hi en ila, kan game khelh dan leh kan result hi a inmil vek lem lo. Ṭha taka kan khel chung pawha kan chak lo tlat hi hriatthiam a harsa," tiin a sawi a, a naute chu huaisen taka beih pui a ngam bawk.

Nipui bazarah khan Leicester City hian keeper ṭha Kasper Schmeichel an chân a, defender pawimawh Wesley Fofana chuan Chelsea a pansan bawk - sum an neih loh avangin player langsar lakluh an nei lo.

Goal khung chu an harsat hran lo, match sarih aṭangin goal 10 an khung tawh - anni aia khung hnem chu club pasarih chiah an awm. An buaina ber chu an tlarhnung a pawp nasa lutuk hi a ni. A bik takin keeper Schmeichel awm loh a langsar hle.

Goal 22 tehmeuh an chhuah tawh, kum 1965-66 aṭanga chhutin West Ham tih lohah chuan match hmasa pasarih aṭanga goal chhuah hnem an ni. Goal khung mah se an chhuah zel avangin an chak thei lo.

International break lai a ni a, club football an khelh ṭan leh hunah chuan Leicester City hian Nottingham Forest an mikhual ang. Kai thar team hi Rodgers hoin an la hmachhawn dawn em, tih a chiang lo, manager ngai hoa an khel a nih chuan chak loh a thiang tawh lo ang.