Van Gaal-a'n penalty dang thei keeper a duh

Netherlands chuan Qatar World Cup-ah an ram tana si ban nghak tur an la tifel chiah lo. Coach Louis van Gaal chuan tun hnaiah Nations League khel tur keeper pali a ko a, anni hian Dutch team rinrawl nih an inchuh ang.

Tuna an squad thar berah Jasper Cillessen (NEC Nijmegen), Mark Flekken (Freiburg), Andries Noppert (Heerenveen) leh Remko Pasveer (Ajax Amsterdam) te koh an ni a, anni hian Van Gaal lung tih awi an tum dawn.

Van Gaal chuan, "Penalty dang thei ber ka duh, anni hi kan enchhin vek dawn a ni. Theihna nei sang leh ṭha tak tak vek an ni a, inkhelh pangngai bakah penalty ven thiam chu a hlawk bik tih ka hria.

"World Cup kan khelh tawhte thlir kir ila, penalty hian hmun pawimawh tak a chang ṭhin," tiin a sawi a, manager tawnhriat ngah tawh tak hian knockout tournament-a penalty pawimawhna a hmuh hmaih lo.

Brazil rama World Cup an khelh ṭum khan Netherlands leh Costa Rica ten quarterfinal-ah penalty an pet. Penalty an pet dawn hian Van Gaal-a'n Jasper Cillessen la chhuakin Tim Krul a dah lut, ani hian penalty dangin an ram a chakpui a ni.

World Cup inbutsaihna atan Dutch team hian Nations League an khel dawn, Poland leh Belgium te an hmachhawn ang. World Cup-ah chuan group A-ah a thlengtu Qatar, Ecuador leh Senegal te nen an awm khawm ang.