Barcelona dinhmunin zia lam a pan, nikumah an hlawk!

Leiba tam tak neih vanga talbuai Barcelona chuan nikum khan sum lamah an hlawk thu an puang a, 2021/22 financial year-ah khan pound maktaduai 86 hlawkna an tel thu an sawi.

Barcelona hian 2020/21 financial year-ah pound maktaduai 422 an hloh a, an sum hloh nasa tak avang hian an player neih ṭhatte pawh chhuahtirin, player tam takin hlawh an tihniam.

Mahse, tun nipui transfer-ah rin loh takin Catalan club hian sum tam tak sengin player an lalut nual a, mipui mak tih hlawh lehzual turin hlawkna an neih thu an puang zui!

Barca hian tun season-ah £240mtd hlawkna an tel hman an rin thu an sawi a, hmanni lawka sum neih loh vanga mittui nena Lionel Messi chhuahtirtu club an indinthar leh mek.

Hmachhawp chu
FC Barcelona thuneitu, board of director-te chu Thawhṭanni zan khan Barça Store Canaletes, Las Ramblas, Barcelona-ah an ṭhukhawm a, season liam taa an sum hman dan leh season thar atana hmachhawpte an thlir ho.

Barcelona thuneitute chuan nikuma an sum chevel chu pound maktaduai 890 a nih thu an sawi a, heta ṭang hian pound maktaduai 86 hlep an nei thei a ni - a nep lo.

Catalan club hian 2020-21 season-ah £422mtd ngawt an hloh tih ngaihtuah phei chuan, kum khat chhung leka insiamrem a, hlawkna an nei hman hi a ropui hle.

Barcelona hian tun season budget atan pound tluklehdingawn 1.10 an pawm bawk a, heta ṭang hian £240mtd hlawkna tel thei turah an inngai - Barca fans tan khua a var ṭan.

Sum senna
Barcelona-in tun nipui transfer-ah pound maktaduai 130 chuang player lakluh nan an seng a, player langsar tak tak lalut an nih bawk avangin, mi tam takin an chet dan mak an ti a, khawia sum nge an neih, tiin an inzawt.

Catalan club-in transfer bazar-a an sum sen hi, player an lakluh hrawl ngaihtuah chuan a tam lo a ni mai thei a, mahse, an leiba neih zat hriatpui tan chuan lo ip chawih chawihna tham a ni.

Chu chauh a ni lo - Catalan club hian free transfer-a player langsar lakluh an nei nual a, hei hi thil hlawk tak angin lang mah se an player lakluhte an hrawl hlawm avangin player hlawha sum sen zat a nghawng tel.

Chutiang a nih lai chuan Barcelona board of director an ṭhukhawm a, an thu chhuak chu pound maktaduai 80 chuang hlawkna an tel thu a ni a, season thar atan £240mtd hlawkna tel an la inbeisei cheu!

Economic lever
Barcelona hian nipui transfer lai khan, keini lam hmelhriat 'economic molecule' ni loin, 'economic lever' an tih chu an hmang a, hei hian club thuneitute chu sum lakluh nana club bungraw neih ṭhenkhat leh share tiral turin zalenna a pe.

Joan Laporta kaihhruaina hnuaia insiamṭhat tum Catalan club hian Barca Studios-a 24.5% chu Orpheus Media hnenah €100mtd-in an an hralh a, hemi hma hian Barca Studios-a 24.5% share chu Socios.com hnenah €100mtd-thoin an hralh bawk.

Hei chauh a ni lo - domestic television rights 25% chu investment firm Sixth Street hnenah kum 25 chhung atan an hralh bawk a, share neuh neuh hralh aṭanga an sum hmuh belhkhawm hi €700mtd a tling.

Sixth Street hnenah hian a tirah domestic television rights 10% chu €207.5mtd-in an hralh a, 15% hralh lehin, hei erawh a zat tarlan ni lo mah se €320mtd vel nia ngaih a ni - an sum hmuh a tam takzet.

Mahse...
June thla lawk khan chuan Barca economic vice-president Eduard Romeu chuan an club chhanchhuak tura euro maktaduai 500 vel an mamawh thu a sawi a, season an ṭan leh meuh chuan euro maktaduai 700 vel an lalut.

Barcelona-in share an hralh ṭhenkhat hi chu club tam takin an tih duh loh tur a ni a, 'tun hun' atan Barca hian an 'hma hun' an hralh ṭhen a ni ber - mahse, tun dinhmuna a lan dan chuan an la tifuh rih niin a lang.

Hriat tel atana ṭha chu Barca player lakluhte en ila, a bik takin Robert Lewandowski-te ang hi chu 'market' keng tel player an ni a, Polish striker vang ringawt hian Barca bungraw hralh nasa takin a pung ang, tih a chiang.

Lewy chauh ni loin contract thar ziaktu Ousmane Dembélé leh Leeds United aṭanga lakluh Raphinha te pawh mipui ngainat an ni a, Barca tan anni ang player neih hi khelmual chhung bakah pawn lamah hlawkna a ni tel.

Vanneihna
Barcelona vanneihna chu an club ropuina hi a ni - sum leh paiah talbuaiin, khelmualah beisei ang result nei lo mah se an sulhnu vang ngawt pawhin player tam takin pan an la châk tlat a, hlawh tihhniam pawh an pawi ti lo.

Lewandowski hian Bayern-ah khan chhiah chawi tur leh cut ngai dangte cut vek hnuah, kum khatah euro maktaduai 12 a hlawh phak niin an sawi a, 25% a hlawh tihniam chungin Barca pan hi a duh tlat!

Player lakluh zingah Franck Kessié, Andreas Christensen, Jules Koundé leh Raphinha te chu a bik takin sum tam tak sen inhuama club dangin an helte an ni hlawm a, mahse, Barca pan an thlang zawk.

Transfer bazar-ah Barca an che fuh a, sumah an che fuh zui a, khelmualah an che fuh rih viau bawk - league match ruk khelhah tlawm an la nei lo a, Champions League match hnih khelhah vawi khat tlawm mah se last 16 luh beiseina a la thi lo a, Barca tan khua a var ṭan e!