Hringnun hi a harsa ve ṭhin - Osaka

Naomi Osaka chuan tun hnaiah hun harsa a tawn nasat thu a sawi a, atan season kal lai chu kum ṭha a nih loh thu a sawi bawk. Season tharah erawh ṭha zawka tennis khelh leh theih tawh a inbeisei.

Kum 24 mi hian rilru lam harsatna a nei a, a dam hnuah pawh ngai a la awh leh thei lo. Season hmasa khan Australian Open nomawi a chawi a, a hnu lamah nomawi chawi a la nei leh miah lo.

Grand Slam vawi li champion tawh hi a tournament khelh hnuhnung pathumah phei chuan, match hmasa berah hneh nei loin a tla nghal vek. World ranking-ah pawh 48-na dinhmun a luah phak hram.

Japanese nula Osaka chuan, "Hrinung hi a chang chuan a harsa ve ṭhin, tluk leh din fawma kal a ngaih chang a awm. A bik takin kumina tournament ka khelh hoah thil ṭha hmuh tur a vang thei hle.

"A lawmawm lai erawh hripui nasa taka a lan hnuah pawh tennis kan la khel thei reng hi a ni a, nun hi chu a hlimawm zawnga kan thlir luih hram hram a ngai ve bawk," tiin a sawi a, tun kara khelh tur Pan Pacific Open-ah a inlan ang.

Pan Pacific Open hi hripui leng vangin kum hnih chhung an khel lo, kuminah erawh an khel leh thei dawn ta. Champion lai chu Osaka-i hi a ni a, mipui enrawn leh ṭan hlawh bik zinga mi a ni dawn.

Nimin khan seeded pasarihna Karolina Pliskova chuan a match hmasa ber a khel nghal, a khingpui Isabella Shinikova chu 6-2, 6-1 in a hneh. World number 1 hlui hian kum li liam ta khan he hmunah hian hlawhtlinna a lo chang tawh, kuminah pawh rinkai zinga mi a ni.

Inkhel dangah Mexican nula, qualifying paltlanga inlan Fernanda Contreras Gomez chuan 2020 Australian Open champion Sofia Kenin 7-6 (7), 6-4 in a hneh. Chinese player Zhang Shuai pawhin Japanese mi Mai Hontama 6-0, 6-3 in a hneh bawk.