Verratti a inkhel thei rih lo

Italy chuan Nations League an khelh turah Marco Verratti an chhawr thei dawn lo. Paris St Germain midfielder hi kar tawpa Lyon nen an inkhelh ṭumin a hliam a, an ram squad aṭangin a inhnukdawk zui nghal.

Minute 64-naah Verratti hi lak chhuah a ni a, inkhelh ban khan PSG head coach Christophe Galtier chuan a player hi a dinhmun endik a nih tur thu a sawi, enfiah a nih hnuah a chawlh rih a ngai dawn ta a ni.

Italy hian Zirtawpni zanah England an mikhual dawn. Three Lions nen an inkhelh aṭanga ni thum hnuah Hungary hmachhawn turin an zin chhuak leh ang - Azzurri tan Verratti awm lo tur hi channa lian tak a ni ang.

Italy manager Roberto Mancini chuan, "Verratti a chawnah an petsak a, tun dinhmunah chuan kea kal pawh a harsat. Ani a awm loh takah chuan Davide Frattesi kan ko thung," tiin a thlaktu tur an thlan fel thu a sawi.

League A Group 3-ah Italy hian match li aṭangin point nga an hmu, an chungah Germany leh Hungary te an awm.