Sharapova tan New York êng a tawp

Duhsak takin wildcard pek a ni a, thla 19 hnua a vawi khan nan Maria Sharapova chu Grand Slam inelna huangah a inlan. Russian nula hian a match hmasa lamah a tennis khelh thiamna hmangin New York khawpui ti êng mawi leh hle mah se Pathianni zan khan Anastasija Sevastova hneh loin US Open zinkawng a tawp.

Tennis tournament zinga sum tamna berah hian Wim­bledon champion lai Garbine Muguruza pawh last 16 lut zo loin a tla a, khawtual nula Venus Williams erawhin an ram beiseina chhi nung zelin a vawi 12 nan US Open quarterfinal a lut thung.

Mangṭha Maria

Grand Slam vawi nga cham­pion tawh Sharapova hi thla 15 hrem a nih hnuah French Open wildcard pek a ni lo a, US Open buatsaihtu lam erawhin world number 1 hlui chungah ṭhat an chhuah. Flushing Meadows, New York-ah Sharapova hi champion tura rinkai khawpin a khel chhuak lehnghal. Amaherawhchu, seeded 16-na Sevastova lakah set hmasa ber la mah se darkar hnih leh minute 16 an inkhelh hnuah 5-7, 6-4, 6-2 in a chak zo ta lo a ni.

World number 146 Sha­rapova chuan, "Hun remchang min siamsaktute chungah ka lawm a, ka theihtawp ka chhuah avangin ka tawn chinah ka lawm. Chawlhkar khat chhung lekin thil tam tak ka zir chhuak leh a, player ṭha lakah pawh hnehna ka la chang thei tih ka finfiah vangin ka lawm," a ti. Sevastova-i a hneh loh hma hian world number 2 Simona Halep, Timea Babos leh Sofia Kenin te a hneh bawk.

Kum 30 mi Sharapova hian a ball vuak na tak chu a la hmang ṭangkai reng a, fourth round inkhelah pawh hian aces vawi li siamin winners vawi 42 zet a vaw chhuak bawk. Mahse, unforced errors ṭum 51 zet a neih laiin a khingpui Sevastova hian vawi 14 chiah a nei thung. Inkhel boruak sang leh hautakah Sharapova hian court chhunga hun a hman tam loh a hriat a, hliam nei loa a khel zui zel thei a nih ngat chuan player hlauhawm a la zui leh thei ang.

Venus a vul

Khawtual mite ṭan hlawh tak Venus Williams chuan harsa lutuk loin nimin zing khan Carla Suarez Navarro lakah 6-3, 3-6, 6-1 in hnehna a chang. Grand Slam vawi sarih champion tawh hian quarterfinal-ah chuan Petra Kvitova a hmachhawn leh ang.

Kum 37 mi Venus hi a kum tam deuh tawh mah se kuminah a khel ṭha tluang hle a, Grand Slam khelh tawh pathum zinga pahnih - Australian Open leh Wimbledon final a lut phak. US Open bikah hian kum 1997 khan a inlan ṭan a, tun ṭumah hian a vawi thum nan champion theih a inbeisei mek.

US nula Venus chuan, "Ar­thur Ashe Stadium-ah min ṭantu an pungkhawm a, awrawl chhuahin min ṭan zia an au­chhuah pui chiah khan ka tan winners vuak a nuam zual, ka chakna hnar an ni," tiin a sawi.

Nimin zing inkhel dang­ah seeded 13-na Pe­tra Kvitova chuan beisei loh tak maiin seeded pathumna Muguruza chu 7-6(3), 6-3 in a hneh. Spain nula Muguruza tan world number 1 nih beiseina a tawp zui ve leh nghal bawk.

Czech Republic nula Kvi­tova hi nikum December thla khan a chenna inah chemte hmang beih a ni a, zai a ngai hial. Hliam a dam hnuah May thla khan a rawn kir leh, tun ṭum­ah hian thleng sang tura beisei zingah tel chiah lo mah se Muguruza lakah set hmasa berah 1-4 zeta a hnufual hnua a khelh chhoh dan en chuan a hming thai bo theih a ni lo ang.