Macau-ah Mizo pathum telna India
AFC Asian Cup 2019 Qualifier-ah vawiin tlai dar 5:00 hian India an inlan dawn a, an hmachhawn tur chu Macau a ni - Macau Olympic Complex-a inkhel tur hi Star Sports 1 leh Star Sports HD1 ten live-in an pe chhuak dawn a, live streaming hmanga en duh tan Hotstar leh Jio TV-ah a en theih bawk ang.
India squad-ah hian Mizo pathum Jerry Lalrinzuala, Lalruatthara leh Jeje Lalpekhlua te chu zin zingah an tel a, Hnahthial tlangval Jeje hi inkhel bul ṭan ngei tura beisei a ni.
India dinhmun
Group A-ah India, Myanmar, Kyrgyz Republic leh Macau an awm a, India hian an match hmasa pahnihah Myanmar leh Kyrgyz Republic hneh tawhin hmahruaitu an ni mek - Macau hi an hneh leh a nih chuan UAE-a Asian Cup khel turin an dinhmun a ṭha tawh khawp ang.
FIFA ranking-a 97-na dinhmun luah mektu India-in 4-2-3-1 formation hmanga an khelh a rinawm a, Bengaluru goalkeeper thar Gurpreet Singh Sandhu chu si ban nghak tura beisei a ni. Pritam Kotal, Sandesh Jhingan, Anas Edathodika leh Narayan Das chu tlarhnung mawi tura ngaih an ni a, an hma chiahah Rowllin Borges leh Eugeneson Lyngdoh-te awmin mual sirah Halicharan Narzary leh Udanta Singh an awm ang. Tlarhmaah Mizo tlangval Jeje chu goal khung turin a mal tlat ang a, number 10 position aṭangin Sunil Chhetri-a'n a thlawp a rinawm.
Tute nge Macau?
Macau hi India tan tumpui huphurhawm niin an lang lo a, Stephen Constantine-a'n a naute hnehna a chanpui zo lo a nih chuan a mualpho khawp ang - Macau hian FIFA ranking-ah 183-na dinhmun an luah mek a, an match hnuhnung berah Hong Kong chu 4-0 ngawtin an ngam lo.
Kum 2011-a kum 18 leka upa nichunga Macau Footballer of the Year dinhmun luah thei Leong Ka Hang chu Macau tan tlarhmaah an innghahna tur a ni dawn a, Hong Kong club Pegasus tana khel mek forward hi 2016 AFC Solidarity Cup-a 'Most Valuable Player' a nih avangin India tlarhnung tan ven uluk a ṭul ang.