Vawiin aṭangin NE Badminton C'ship
North East Zone Interstate Badminton Championship 2017 chu vawiin chawhma dar 10:30 hian R. Dengṭhuama Multipurpose Hall-ah hawnna neih a ni ang a, Zonet Cable TV chuan live-in a pe chhuak dawn.
NE badminton khawmpui lianah hian state pariat inelna thlengtu Mizoram bakah Arunachal Pradesh, Assam, Manipur, Meghalaya, Nagaland, Tripura leh Sikkim te an inel ang.
Inelna hi senior leh junior category-a ṭhenhran a ni a, category pahnih tan hian team inelna leh open inelna siam hran a ni leh bawk. Team inelna hi vawiin aṭangin khelh ṭan a ni ang a, knockout a khelh tur a nih avangin naktukah a zo nghal ang. Open inelna hi naktuk hian khelh ṭan beisei a ni a, NE Badminton C'ship hi September 8-a khelh zawh tur a ni.
Team inelna hi junior leh senior-ah men's singles, women singles, men's doubles, women's doubles leh mixed doubles hmanga neih tur a ni a, champion chiahin National Championship an khel ang. Mizoram hi an la champion ngai loh avangin team inelnaah National C'ship-ah an la inlan lo.
Tun ṭumah hian Mizoram number 1 Manajit Singh chuan hun rei tak inpuahchahna kalpui hnuah mimal harsatna a neih avangin a inhnukdawk a, hei vang hian champion lai Assam leh Manipur te chu Mizoram aia rinkai zawk an ni chhunzawm ang.
Mizoram manager Zabiakthara chuan, "Inpuahchahna ṭha takin kan kalpui thei a, beisei pawh kan nei sang hle. Manajit-a tel thei lo hi pawi kan ti a, chutihrualin ani awm lo pawh hian team ṭha tak kan la ni a, champion theih kan la inring fan a, theihtawp kan chhuah ang," tiin Vanglaini a hrilh.
Manajit awm lo takah chuan Mizoramin pressure nei loin an khel thei ang. Mizoram manager Zabiakthara chuan, "Mizo mipuite aṭangin ṭawiawmna ṭha kan beisei a, inelna thlengtu kan nih bawk avangin kan thawhhona a ṭhat a ṭul a ni," tiin a sawi.
Badminton Association of India (BAI) kaihhruaina hnuaia MBA-in a thlen inelna fixtures pawhna hi nizan khan neih a ni a, he thu ziah lai hian kan hre hman lo. Naktuk tlai aṭang hian open inelna ṭan hman beisei a ni a, he inelnaah hian singles-ah state tinin pahnih an thawh theih ang a, category dang zawng men's doubles, women's doubles leh mixed doubles-ah chuan pakhat bak an thawh thei lo ang.
BAI hian India ram hi zone rukah a ṭhen hranga a, chungte chu West Zone, East Zone, Central Zone, North Zone, South Zone leh University Zone-ah te a ṭhendarh a. Team inelnaah chuan zone khat aṭangin pakhat chiah tel theih a ni a, open inelnaah erawh semifinal lut pha chinin National C'ship hi an khel ang.