World Cup khel tur Belgium

Belgium chu FIFA World Cup 2018-a a thlengtu Russia tih loha Europe aṭanga inpet tling hmasa ber an ni - Red Devils (Belgium sawina) hian Pathianni zan khan an mikhualna ramah Greece chu 2-1 in an hneh a, hmabak match hnih la nei mah se match riat an khelh tawhah tlawm hmel an la hmuh loh avangin umphak theih an ni tawh lo.

Greece-a inkhelah goal lut turin minute 70 nghah thlen ngai mah se he inkhela goal thum lutte hi minute nga chhung leka lut vek a ni! Tottenham Hotspur defender Jan Vertonghen-a'n minute 70-naah goal hmasa ber hi a khung a, Zeca-a'n Greece tan minute thum hnuah a sut ve nghal. Mahse, Greece fan-te hlim authawm pawh a reh fel hmain Romelu Lukaku-a'n a khung chhunzawm ve lehnghal a, Belgium an chak.

Red Devils hma hian Brazil, Mexico, Iran leh Japan te chu World Cup 2018 khel tur hian an lo inpet tling tawh a, Russia chu inelna thlengtu tur an nih avanga tling chiang sa an ni.

Belgium coach Roberto Martinez chuan, "Europe aṭanga World Cup khel tura inpetkai hmasa ber kan nih avangin inchhuang tur kan ni a, tun aia ṭha zawk kan nih zel theih nan theihtawp kan chhuah chhunzawm ang," tiin an chawlh mai loh tur thu a sawi.