Netherlands tan beiseina a nung thar

France hmaa 4-0 ngawta an mualpho hnu lawkah Netherlands an insiamṭha nghal a, Pathianni zan khan an World Cup beiseina chhi nung turin Bulgaria chu 3-1 in an sawp - UEFA World Cup qualifier Group A-ah boruak a nung sawt.

Football-ah engpawh a thleng thei tih chu France hmaah fiahin a awm nawn - Group A inkhel dangah France hian FIFA ranking-a 136-na Luxembourg chu goal khung loin an inhnehtawkpui. Kum 1914 hnua Luxembourg an hneh zawh lohna hmasa ber a ni.

Dutch pasalṭha Propper

Netherlands chakna chu Brighton midfielder thar Davy Propper a ni - Premier League kaithar club tana khel Propper hian minute sarihna lekah goal hma­hruai a khung a, a goal hnihna nghak thleng turin minute 80 a nghah thlen a ngai thung.

Propper bakah hian Arjen Robben chuan hnai set sawt a-

ṭangin goal a khung ve bawk a, Netherlands-in goal hnih an khung hnuah Georgi Kostadinov chuan Bulgaria beiseina chhi nung turin free kick aṭangin khung ve bawk mah se goal dangin a zui thei lo a, Dutch team an chak.

Netherlands beiseina

Oranje (Netherlands sawi­na)-in an hmabak match hnih­ah Belarus leh Sweden an la hmachhawn leh dawn a, pahnihna ni mek Sweden hi point thumin an phak lo - ram pahnih inhmachhawn tur hi 'playoff' hmun inchuh tur anga ngaih theih a ni.

Netherlands captain Robben chuan, "Hmabak hautak zetin min hmuak a, mah se kan thih hma chu theihtawp chhuahin kan bei ang," a ti! Oranje boss Dick Advocaat chuan, "Kan chak avangin ka lawm a, mah se kha aia tam zawk goal khung kan zir a ngai a ni," tiin goal difference ṭangkaina a hmuh hmaih lo.

Vanduai France

Les Bleus (France sawina) tan Manchester United midfielder Paul Pogba, Atletico Madrid forward Antoine Griezmann leh Paris St-Germain forward thar Kylian Mbappe ten inkhel bul ṭan ṭheuh mah se France-in an hlawhchhuah chu 76% ball possession, shot 34 leh wood­work vawi hnih pet per a ni!

Griezmann-a'n 30 yard vela hla aṭangin freekick a pet a, bar a pet per. United midfielder Pogba-a'n chance nei ve bawk mah se bar tauh per nan bak a hmang thei bik lo. Hun tawp a hnaih meuh chuan France hi team vannei zawk an ni - Luxembourg substitute Gerson Rodrigues-a'n Laurent Koscielny a tlan pelh hnuah a hun ṭha neih goal-ah a chantir thei lo.

A tawp thlengin

France manager Didier Deschamps chuan, "Netherlands kan hneh kha a pawimawh a, chutiang bawkin Luxembourg pawh hneh a ṭul. Mahse, kan tih theih tak loh avangin a tawp thleng kan beih a ngai dawn tihna a ni. Match hnih kan la hmabak a, a pawimawh khawp ang, " a ti - transfer bazar-a France squad pumpui hlut zawng kha pound maktaduai 400 vel a ni a, Luxembourg player zingah club-in sum senga an leichhuah pahnih chiah an la awm thung!

Les Blues hi an hnuai chiaha awm Sweden aiin point khatin an la sang a, an hmabak match hnihah Bulgaria leh Belarus te an hmachhawn ang.