Wales tan zan pawimawh

Wales-in an ram history-a a vawi khat nan UEFA Euro 2016 an khel a, semifinal hial an thleng. Dragons (Wales kohna) hian kum 1958 khan FIFA World Cup an khel a, hemi hnu hian khawvel inelna ngaihhlut ber an tih mai World Cup-ah an inlan leh lo.

FIFA World Cup qualifier khelh mekah zanin dar 12:15 hian pathumna dinhmun hauh mek Wales-in Group D mawngphaha awm Moldova an hmachhawn dawn a, Chris Coleman hote chunga awm pahnih Republic of Ireland leh Serbia ten hmahruaitu nih an inchuh ang.

Reds rawlthar Woodburn

Kum 17 mi Ben Woodburn-a'n kum sarih leka upa a nihin Liverpool academy a zawm a, English club tan hian nikum November 26 khan a khel ṭan a, Reds tan vawi nga chauh la inlan mah se Wales tana a inlan hmasak berah goal a khung der tawh.

Dragons-in Austria an hneh ṭumin Woodburn-a'n goal awm­chhun a khung a, Reds rawlthar zarah Wales-in World Cup khelh an la beisei ngam. Woodburn hian khelmualah minute 20 chuang awrh hun a hmang a, Reds rawlthar hi a la naupan avangin second half-ah bak khelhna hun a chan erawh a rinawm loh.

Wales tana thu lawmawm chu Moldova hmachhawn turin midfielder Joe Allen leh defender Neil Taylor te an rawn kir a, Chris Coleman-a hote hian chak mai duh tawk loin goal tam zawk khung an tum dawn. Dragons hian Georgia leh an chunga awm Republic of Ireland te an hmachhawn ang.

Hmahruaitu inchuhna

Group D-a dinhmun ṭha ber erawh Serbia an ni a, Europe-a player lar ni phak Nemaja Matic, Dusan Tadic, Branislav Ivanovic leh Matija Natasic te telna team hian khualmuala Republic of Ireland an draw phak a nih chuan an hmabaka awm Austria leh Georgia te an nih avangin World Cup an khelh ngei a rinawm.

Amaherawhchu Republic of Ireland-in an muala Serbia an hneh a nih chuan hmahruaitu an ni dawn a, coach Martin O'Neil pawhin an dihmun hrechiangin, "Serbia hneh tur hian kan theihna zawng zawng kan chhuah a ṭul a, kan chhuah ngei bawk ang," tiin chak tuma an khelh tur thu a sawi ve bawk.

Group G lam

Spain-in chhiar­kawp danin World Cup la tling lo mah se an­mahni hnaih bertu Italy awlsam taka an hneh avangin anni lo chu group hma­hruaitu tur an awm chuang lo. La Roja hian Real Madrid player duhawm Isco leh Marco Asensio bakah Chelsea forward Álvaro Morata te an kawl avang­in inelna tak takah pawh champion rinkai an ni phak ang. Zanin hian Spain hian point la hmu lo Liechtenstein an tlawh ang.

Italy-in Spain hneh lo mah se playoff dinhmun sawhnghet turin awmhmun an sawhngheh a ṭul a, Azzurri hian zanin dar 12:15 hian playoff beiseina la nei Israel an mikhual dawn a, inkhel hi Sony Ten 1-ah a en theih ang.

Group I hi

Croatia-in group hmahruaitu ni turin Zagreb-ah Kosovo chu Domagoj Vida goal hmangin 1-0 in an hneh a, goal awmchhun hi Luka Modric siam sak a ni. Croatia hian Turkey an hmachahwn dawn a, an khingpui tur hi palinaah awm mah se pakhatna dinhmun la hauh thei an ni.

Group I inkhel dangah bei­sei phak baka Euro 2016-a khel ṭha Iceland leh Ukraine te an inkhel dawn a, a sang pali an inkhelh vek dawn avangin inkhelh zawhah team dinhmun nasa takin a danglam thei ang.