MFA-in hremna lekkawh

Mizoram Football Association disciplinary committee chuan Din­thar FC leh Chanmari FC inkhelh ṭuma che mawi lo Maimawms defender Zothanzuala chu hnawhchhuah a nih avanga match hnih hrem a nih bakah match khat belh sak a ni a, Rs 1,000 chawi tura tih a ni bawk.

Dinthar FC defender Zuala leh forward Lal­nun­sanga (Tale-a) te chu khelmual chhunga an chet dan avangin MFA dis­ciplinary committee hmaah an inlan dawn bawk a ni.

Maimawms hian Chanmari FC an khelh ṭuma hnawhchhuah hma­sak zawk Nigerian forward Jackson-a hremna chu tihnep sak turin an ngen a, MFA disciplinary committee hian referee hmuh dan kaltlang puiin an dilna hi an hnawlsak a, Dinthar FC forward hi match hnih hrem tur a ni.

Vanglaini thu dawn danin Dinthar FC lam hian thil thlen dan video chiang zawk an neih avangin MFA dis­ciplinary committee hnen­ah ngenna thehluh nawn an tum. Chanmari FC an hmachhawn ṭumin Nige­rian forward hnawhchhuah a nih avangin point an hlawh chhuak lo a, Jackson hian tihsual a nei lo a nih chuan hremna hi a pumpelh thei ang.

MFA disciplinary committee hian Santosh Trophy-a Mizoram team aiawh kal tura kohna chhang lo Aizawl FC winger H. Lalmuankima leh Bethlehem Vengthlang defender Vanlalzuia te chu match hnih hrem bakah Rs 3,000 chawitir an ni a, player pahnih hian MPL6 match hmasa berah an inlan lo a, match khat ve ve an la hmabak.