Goal mamawh Messi awmna Argentina
Tlarhma lamah khawvel player langsar tak tak awm chungin Argentina-in goal an khung tam tawk lo a, naktuk zing dar 5:00 hian World Cup qualifier khel turin Venezuela an mikhual dawn. Lionel Messi hoa khel Argentina hian point an mamawh a, an mamawh ang hmu turin goal an mamawk bawk.
Messi, Paulo Dybala, Angel Di Maria, Mauro Icardi leh Sergio Aguero te nei chungin Jorge Sampaoli nau ten Uruguay lakah goal an khung lo a, South America ram 10 inel zinga pangana niin tuna an dinhmunah chuan nakkum World Cup khelhna tur Russia pan turin ticket an la hlat rih, world champion vawi hnih ni tawh hian anmahni ramah fiahna an hmachhawn dawn.
Copa America champion Chile pawhin beisei angin qualifier an khel ṭha lo, match 15 khelh tawhah point 23 hmuin palina an ni. Chile hi an hnuaia awm Argentina nen an point hmuh zat a inang, table-a pakhatna Brazil an tling chiang tawh a, Tite naute hi pahnihna Colombia nen an inkhelh dawn avangin Uruguay, Chile leh Argentina te tan umphak theihna hun ṭha a ni - match thum chiah khelh hmabak an neih tawhah an dinhmun a la inthlak thleng vek thei.
A goal a ngai
Argentina manager Sampaoli-a'n, "Kan khingpui te goal bula awm tur player kan la mamawh belh a, kan mamawh goal kan khung ngei a ngai. Draw leh chak loh sawi a hun tawh lo a, hnehna chang chung ngeiin Russia pan turin kan inpet tling ang," a ti. Sevilla manager hlui hian World Cup khel turin an ram chu tlinpui a inbeisei hle.
Argentina mikhual tur Venezuela hi table mawngphah a awm an ni a, goal 34 chhuah tawhin Bolivia nen goal chhuah hnem ber an ni. Ram tana goal khung hnem ber Messi (58 goals) leh a ṭhiante tan paltlang harsa lo tura ngaih an ni.
Tun ṭumah hian kum 57 mi Sampaoli-a'n Juventus striker Gonzalo Higuain a ko lo a, Turin club tana a khelhpui Dybala chuan Uruguay lakah inkhel bul a ṭan thung. Inter Milan captain Icardi-a'n bul a ṭan dawn em tih a la sawi chiang duh lo a, bench lama hun a hmantir ṭhin Aguero pawh chhawr theih turin a inpeih bawk.
Argentina tan hian hrem vangin defender Gabriel Mercado a inlan theih dawn loh avangin Javier Mascherano chu pawh hnun theih a ni ang a, midfielder Guido Pizarro aiah Ever Banega chu inkhel buṭan tura ngaih a ni bawk. Argentina hian match 15 khelh tawhah goal 15 khungin an lamah goal 14 a lut thung a, tlarhma leh a hnung lam pawh insiamṭhat ngaihna lai an nei.
Harh ngai Chile
Chile hian an match hnuhnung berah Paraguay chu 3-0 in an hneh lo a, he inkhelah hian captain Arturo Vidal-a'n anmahni lamah a tilut palh. Bayern Munich midfielder hian inkhelh banah international football chawlhsan thut theih a nih thu a sawi zui bawk - South America champion hian result ṭha nei tur chuan 'phurna' an mamawh.
Arsenal forward Alexis Sanchez-a'n club lamah transfer buruak rit tak a neih avangin tun hma angin ram tan beisei a phak lo a, Barcelona forward hlui hi 2015 leh 2016 Copa America nomawi an chawi theih nana player pawimawh ber pakhat a nih avangin ram tan a theihna tak a pho chhuah leh a ngai tawh bawk.
Chile coach Juan Antonio Pizzi chuan, "South America champion kan nihna hi kan lantir leh a hun tawh, kan dinhmun ngaihtuahin a ṭha tawk lo. Hlauh nei loin khelmual chhungah kan chet a hun leh tawh a ni," tiin a naute chu huaisen turin a fuih.
World Cup thleng tur Russia tih loa tling hmasa ber Brazil-in an hnuai chiaha awm Colombia an lenchilh dawn. Tite enkawl Brazil hi tling chiang tawh ni mah se football a nih tawh chuan chak loh an duh lo ang. Khaweval player manto ber Neymar hoa khel Brazil hian goal 37 khung tawhin South America ram 10 zingah an sang fal hle.
Zanin/Nilaini zing Inkhel Tur
Bolivia 1:30 AM Chile
Colombia 2:00 AM Brazil
Ecuador 2:30 AM Peru
Argentina 5:00 AM Venezuela
Paraguay 5:30 AM Uruguay
Inkhel hi Sony Ten 2-ah live a ni ang