ATK-ah Portsmouth midfielder hlui

Atletico de Kolkata chuan English attacking midfielder Carl Baker an lalut a, kum 34 mi hian season hman zawh takah khan Portsmouth tan League Two-ah match 45 khelin goal kua a khungsak. Tun season ṭan a nih hnuah pawh match hnih khel leh hman mah se India lam a rawn pan ta a ni.

Liverpool youth system chhuak Carl Baker hian English championship leh League One lamah a hun tam zawk a hmang a, English club hriat hlawh zingah Coventry City leh MK Dons tan pawh a lo khel tawh. Coventry-ah hian season nga hun a hman chhungin match 182 a inlanah goal 28 a khung.

Non League club Southport tan a khelh laiin Conference North-ah 2004-05 season khan champion a nihpui a, 2014-15 khan MK Dons chu League One-ah pahnihna dinhmun luahpuiin Championship an inhlangkai a, Club Player of the Year-ah hial thlan a ni.

English coach Teddy Sheringham leh technical director Ashley Westwood enkawlna hnuaia khel tur ATK hian Carl hma hian ram pawn player zingah Robbie Keane, Jose Egas dos Santos Branco, Conor Thomas leh Jussi Albert Jaaskelainen-te an lo lalut tawh bawk.