Hamilton tana hmun hlu bik Monza

Pathianni zan khan Auto­dromo di Monza-ah Formula 1 Italian Grand Prix tlan a ni a, Mercedes driver Lewis Hamilton tan kum 1922 daih tawha siam tlankawng hi hmun hlu bik a ni.

British driver hian Michael Schumacher-a record lo siam tawh (68 poles) chu khumin a vawi 69 nan pole position aṭangin bul a ṭan, intlansiakna tak ṭan a nih hmain record thar a siam nghal phawt.

Inelna tak neih zui a ni, lap 53 an tlan zawh hnuah Hamilton hi pakhatna a ni a, tun season bikah vawi ruk hnehna a channa chiah niin driver championship-ah a chunga awm Ferrari driver Sebastian Vettel a lehpel nghal bawk - a tan ni chhinchhiah tlak bik a ni chiang.

World champion vawi li ni tawh Vettel hi Mercedes driver pahnih Hamilton leh Valtteri Bottas te hnungah a thleng a, point 235 hmuin championship-ah hmahruaitu Hamilton aiin point thumin a hniam ta zawk rih. September 17 hian Singapore Grand Prix tlan a ni leh dawn, he hmun hi tun hma lam chuan Ferrari team chetṭhat ṭhinna hmun a nih avangin Vettel hian a hmahruaina laklet theihna hun ṭha a nei tura ngaih a ni.

Tun season-a vawi li hnehna chang tawh Vettel chuan, "Ni ṭha tak tia sawi tur a ni lo, chutih­rualin kan team ṭanrualna leh hmasawnna hmuh tur a awm, duhthusam chu la ni chiah lo mah se kan hmasawnna vangin ka lawm. Intlansiak hmabak pasarih chiah kan neih tawh avangin Singapore-ah chuan pakhatna neih kan beisei tur a ni ang," tiin a sawi.

Formula 1 vawi thum cham­pion tawh Hamilton chuan, "Kuminah Ferrari an che ṭha hle, chutih karah harsa taka hnehna kan chang thei hi a lawmawm hle a ni. Ka tan ni lawmawm bik a ni a, chutihrualin pakhatna leh pahnihna kan neih theih avangin team kan cheṭha tih a chiang. Silverstone aṭanga harhtharna kan chan kha kan la chawm nung zel a ni," a ti.