Australia-ah Mizo rawlthar an vul Jeremy = Gold ; Zakhuma = Silver
Commonwealth Weightlifting Championship 2017 neih mekah nimin khan Jeremy Lalrinnunga chuan Youth & Junior (56k category) ah gold medal a la a, Mizo rawlthar dang Zakhuma chuan Youth-ah silver medal a dawng thung.
Gold Coast, Australia-a inelna neihah Jeremy hian gold medal hlawh chhuak tur hian Snatch (109kg), Clean & Jerk (131kg), Total (240kg) a chawi. Snatch bika a chawi zat 109kg hi Commonwealth Youth & Junior record thar a ni.
International level-a a vawi hnih fehchhuahnaah kum 2016 India Youth silver medalist Zakhuma pawhin seilver medal dawng tur hian Snatch (95kg), Clean & Jerk (120kg), Total (205kg) a chawi ve bawk. Zakhuma hian training-na lama a chawi zat chawi thei rih lo mah se India tana a medal hmasa ber a hlawh chhuak.
Commonwealth Weightlifting Championship-ah hian national medal pathum dawng tawh Mizo nula Lalchhanhimi pawh a inlan a, he thu buatsaih lai hian Khawzawl nula hi a result kan hre hman lo.
Weightlifting coach (SYS) Malsawmkima Khiangte chuan, "Kan nauten hlawhtlinna sang tak an chang ta hi ka lawmpui a, an bul ṭan chhoh dan vel ngaihtuah letin an medal dawn hi a hlu zual hle. Mizote hian tihtakzetna kan nei a nih phawt chuan khawveala a ṭha ber berte zingah kan tel phak ve tawh tih a chiang," tiin Vanglaini a hrilh.
Catch them Young
Mizoram Weihghtlifting Association in kum 2011 khan Weightlifting Academy State Sports Coaching Centre chu Govt. Complex-ah a din a, he hmunah hian Weightlifting coach (SYS) Malsawmkima Khiangte kaihhruaina hnuaiah Govt. Complex rawlthar Jeremy-a leh Zakhuma te hian an zinkawng bul a ṭan.
Theihna an neih ṭhat zia a tir aṭangin a lang chho nghal a, kum khat a liam meuh chuan an theihna ti pung turin Mizoram an chhuahsan. Kum 2012 April thla khan Army Boys, Pune-a training turin an tling a, he hmunah hian kum naupangte ni chungin foreign coach Gubala slovakia leh Army coach Zarzokima te kaihhruaina hnuaiah an intuaihriam chhunzawm.
Lalneihtluanga leh Lalmuanpuii te fapa Jeremy hian training ṭha leh zual zawk a neih chhoh hnuah national leh international thlengin medal a hlawh chhuak chho ta malh malh a, kumin Commonwealth Championship khel tur hian Zakhuma nen hian thlan niin January thla aṭang khan Patiala, Punjab-ah India camp an zawm a, tun hun hi an thleng chho ta a ni.
Vanpuithanga leh Lalnunfeli te fapa Zakhuma hi international level-ah chuan a vawi hnih fehchhuahna a ni a, a tan medal hmasa ber a ni bawk. Mizo rawlthar pahnih te hian an thlen chin aṭanga hma an sawn chho zel a nih chuan medal lian leh ropui dang pawh an awrh chho zel theih a beiseiawm hle.
Jeremy Lalrinnunga Sulhnu
# Inelna Kum Ram Medal
1 Commonwealth Youth 2016 Malaysia Gold
2 IWF World Youth 2016 Malaysia Silver
3 Asian Youth 2016 Tokyo Silver
4 India Youth & Junior 2016 India Gold (2)
5 IWF World Youth 2017 Thailand Silver
6 Commonwealth 2017 Australia Gold (2)