NE Zone Badminton C'ship an ṭan ta
North East Zone Inter State Badminton Championship chu nimin khan R. Dengṭhuama Hall, Aizawlah khelh ṭan a ni. Mizoram chief minister Lal Thanhawla chuan badminton khawmpui lian hi a hawng.
Niminah hian team inelna ṭan nghal a ni a, Mizoram chuan Arunachal Pradesh 3-2 a hnehin bul an ṭan. Vawiin chawhma dar 9:00 hian inelna hi neih chhunzawm tur a ni a, senior inelnaah Mizoram leh Sikkim ten final luh an inchuh ang a, semifinal pakhat zawkah Assam leh Manipur te an inhmachhawn ve bawk ang. Final hi vawiin tlai lama khelh tur a ni.
Mizoram chief minister Lal Thanhawla chuan, "TATA Trusts leh MBA te hmalaknain Pullela Gopichand (chief national coach) chuan Mizoram a rawn tlawh a, Sihphir-a high altitude training centre dinna tur an rawn en. Sorkar pawhin hma a la a, MBA te nen ṭangkawpin Mizoramah badminton hmun pawimawh hi bun ngei tum a ni. Kan sorkar hian ṭhalaite tan theihtawp kan chhuah zel ang," tiin a sawi.
NE Zone Badminton C'ship chhim tura rawn kal BAI secretary Anup Narang pawhin Mizoramin badminton-a hma an sawn chu lawmawm a tih thu a sawi. Inelnaah hian North East state pariat Mizoram, Arunachal Pradesh, Assam, Manipur, Meghalaya, Nagaland, Tripura leh Sikkim te an tel kim vek.
MBA president C. Zorammuana chuan, "Kan chief minister Pu Hawla hi badminton-ah chuan hmahruaitu a ni a, a pa hi court nei hmasa ber tia sawi ṭhin a ni. Ani in kan inelna min hawn sak thei hi kan lawm hle... Inelna buatsaihna atan sorkar, NEC leh mimal inphalte aṭangin ṭanpuina kan hmu a, kan lawm takzet a ni," tiin Vanglaini a hrilh.
Mizoram hian match hmasa berah 2013-15 chho a India junior number 1 Laa Talar awmna Arunachal Pradesh an hmachhawn a. Match hmasa berah Samuel Lalnunmawia chuan Prakash Padukone Academy chhuak Laa Talar hi hmachhawnin 18-21, 21-10, 20-22 in vanduai mah se an intluk tawk avangin Mizoram teamin inrintawkna an neih phah.
Women's Singles-ah Samuel-a nau Lalrinzuali hnehna a chang a, men's doubles-ah Lalmuanawma leh Lalduhawma (Lalmama) te inkawpin hnehna an chang leh bawk. Women's doubles-ah F. Vanlalhriatpuii leh Zuali te vanduai mah se deciding match-ah Lalmama leh Hriati ten chiang taka hnehna changin Mizoramin semifinal hi an lut a ni.
Nimin tlai khan junior inelna ṭan a ni a, result kan hre hman lo. Open inelna hi naktuk hian khelh ṭan tur a ni ang.