India-in Asian Cup 2019 an hnaih
AFC Asian Cup 2019 Qualifier-ah India chuan match thum an khelh tawhah hnehna an chang vek. Nizan khan India hian Macau chu khualmualah an lenchilh a, 2-0 in hnehna an chang. India tana goal hnih khungtu hi second half-a tlan luhtir Balwant Singh a ni.
Group A-ah India-in an awmpui Myanmar, Kyrgyzstan leh Macau-te vawi khat ṭheuh tumin an hneh kim vek tawh a, India-in an ke lehlamin Asian Cup 2019 an rap tawh tih ngam a ni - Group A aṭangin a sang pahnih an tling dawn.
Jeje telna
India tan beisei lawk ang ngeiin Mizo tlangval Jeje Lalpekhlua'n inkhel bul a ṭan a, tlarhmaah goal nawr turin Sunil Chhetri nen dah an ni. Gurpreet Singh Sandhu chu si ban nghak tura dah a ni a, tlarhnungah Pritam Kotal, Sandesh Jhingan, Anas Edathodika leh Narayan Das-te an inkawp.Rowllin Borges leh Eugeneson Lyngdoh chu mual laiah dah an ni a, a sir aṭanga nawr turin Udanta Singh leh Halicharan Narzary an inkawp.
Stephen Constantine-a'n game pawimawhah tawnhriat nei ṭha tawh players rual chhawr a thlan avangin Mizo tlangval pahnih Jerry Lalrinzuala leh Lalruatthara te tan hmun a awm lo a, bench lamah hun an hmang tluan.
Balwant 100%
Mikhual khelmualah India an tlangnel a, inkhel ṭantir aṭangin 'nawrtu' an ni, Macau lamin goal venhim an thlang thung - Macau lamin goal venhim ngawt an ngaihtuah karah India-in game hmuhnawm an pho chhuak thei bik lo a, Jeje Lalpekhlua'n chance vawi thum vel ngawt nei mah se Macau defender ten an bawr hneh ṭhin avangin a duh angin Jeje a che thei lo.
Goal lut loa chawlhlawk hman a nih hnuah second half-ah Balwant Singh tlan luhtir a ni a, Punjabi striker hian a hna thawk turin hun a duh rei lo. Minute 57-naah khel ṭha tak Narayan Das ball siamsak chu goal-ah a chantir a, minute 82-naah Macau goalkeeper Ho Man Fai chetsual nangchingin goal hnihna a khung zui - Mohun Bagan aṭanga Mumbai City zawmtu striker hian India tan match thum a khelhah goal thum a khung ta.
India hmabak
Group A-ah nimin vek hian Myanmar leh Kyrgyzstan chu inhmachhawn tura tih ni mah se inkhelhna tur hmun Kyrgyzstan sorkarin an ram Football Association hnenah tualchhung boruak him loh thu an hrilh avangin khelh hun sawn a ni.
India hian October 14-ah qualifier match an khel leh ang a, Macau an mikhual thung ang. Macau an mikhual hma hian India hian October 2-ah Palestine chu friendly match khel turin an mikhual leh dawn phawt a, an khelhna tur hmun tihchian a la ni lo.