IPL chhuahtu tur Star TV
Star India chuan India rama club cricket inelna lar Indian Premier League media rights an chang a, TV leh digital broadcast atana IPL media rights an channa zat hi vaibelchhe 16,347.50 a ni a, pound tluklehdingawn khat chuang tihna a ni.
IPL chhuah duh hian company 24 ngawtin Invitation To Tender (ITT) lehkha an la a, mahse Thawhṭannia bid neih ṭumah tak erawh 14 chiah an inlan. Company langsar zingah Yahoo, Amazon leh ESPN digital te chu he hunah hian ITT la siin an inlan lo.
IPL media rights neih tum zingah Sony leh Star TV an intluk tawk viau. TV rights bikah phei chuan Sony hian vaibelchhe 11,050-in an bid a, Star TV ngamna zat vaibelchhe 6,196 nen a inthlau hle. Mahse, media rights pumpui belhkhawma Star TV ngamna hi a san zawk avangin 2018-2022 chhunga IPL media rights hi an hlawh chhuak ta a ni.
Sony Pictures Network hi IPL chhuahtu hlui an ni a, kum 2008 khan vaibelchhe 8,200-in IPL media rights hi kum 10 chhung atan an lo hlawh chhuak tawh.