Dan theih loh Rafael Nadal

US Open nomawi inchuh boruak a sang chho mek zel a, zanin hian quarterfinal khelh a ni ang. World number 1 Rafael Nadal-a'n rawlthar Andrey Rublev a hmachhawn dawn, inkhel hnuhnung zawkah Roger Federer hmaah Juan Martin del Potro a ding dawn - Nadal leh Federer te hi an chak a nih chuan an inkhel zui leh dawn a ni. Inkhel hmasa zawk hi zan dar 9:30 aṭangin Star Sports Select 1-ah live a ni ang.

Thawhṭanni zan khan Flushing Meadows, New York-ah mipa singles last 16 hi khelh a ni a, seeded pakhatna Nadal, world number 3 Federer, kum 19 mi Rublev leh US Open bika mipui ṭan hlawh em em Del Potro te chuan an khingpui ṭheuh hnehin a sang pariat zingah an inhlangkai.

Nadal chu Nadal

Grand Slam vawi 15 champion tawh Nadal-a'n last 16 paltlang turin amah chai tawk deuh a la tawng lo. Spain tlangval hian darkar khat leh minute 41 chhung lekin Alexandr Dolgopolov chu 6-2, 6-4, 6-1 in a sawp. Kum 31 mi Nadal hian unforced errors vawi 11 chiah a nei a, mipa singles last 16 match bikah tihsual nei tlem ber a ni.

US Open vawi hnih champion tawh Nadal chuan, "Infiamna kan chawlhsan hunah chuan kan chak loh lai leh chetchhiat lai hi miin an hre reng dawn lo a, hnehna kan chan lai hi an hriatreng tur chu a ni. Chuvangin inkhelh zawng zawngah hian hnehna chan ngei tuma beih tur," tiin rawlthar Rublev lakah zahngaihna lantir a tum lo.

Inkhel dangah Russian rawlthar Rublev hian darkar hnih leh minute nga chhungin seeded pakuana David Goffin chu 7-5, 7-6 (7-5), 6-3 in a hneh. Andy Roddick (2001) tih lohah chuan Flushing Meadows-a quarterfinal lut thei naupang ber a ni. Rublev-a'n a mumang rama chen chhunzawm zel a duh a nih chuan Nadal a barakhaih a ṭul dawn.

Rublev hi tunlai tennis khawvela rawlthar ṭhangduang tak pakhat a ni. June thla khan world ranking-ah 100-na a ni phak hram a, July khan 50-naah in vawrh chho dawrhin thla hmasa khan 49 a ni leh hman bawk. US Open second round-ah seeded pasarihna Grigor Dimitrov a hneh tawh bawk avangin Nadal tan pawh zuam sual theih tur a ni ang.

Nadal nen an inkhelh tur thlirin Rublev chuan, "Rafa hi khawvela ṭha ber a ni a, a hmaah ka theihtawp ka chhuah ang. Quarterfinal ka thleng hi ka tan chuan a lawmawmin a nuam tawh hle a, hloh leh chuan tur ka neih loh avangin nuamti takin ka khelh chhunzawm ang," tiin a sawi.

Inlehthalna

Juan Martin del Potro-a'n Dominic Thiem lakah set hmasa pahnih a hloh a, set lina game 12-na an khelh laiin Thiem hian match point vawi hnih a neih hial. Mahse, Argentine tlangval hian darkar thum leh minute 35 hnuah 1-6, 2-6, 6-1, 7-6 (7-1), 6-4 a lehthalin hnehna a chang.

Seeded 24-na Del Potro hian kum 2009 khan US Open nomawi hi a chawi tawh a, a hnu lamah erawh ban rek na vangin beisei angin hlawhtlinna a chan chhunzawm lo. A hliam dam hnuah zawi muangin hma a sawn chho leh a, service leh fore hand na tak a la neih avangin player hlauhawm a la ni reng.

Kum 28 mi Del Potro chuan, "Ka tan chuan US Open hi match pawimawh ka khelhna hmun a ni a, min ṭantu leh duhsaktu an tam avangin hmun hlu bik a ni. Tun ṭumah pawh khan thawk a harsa a, ka duh avngin ka che rang lo bawk. Dominic khan inkhel a thunun hneh em avangin chak lo tlang tura ngaih ka ni. Chutichung chuan min ṭantute thawm a reh lo a, min auphur takzet a ni," a ti.

Inkhel dangah Grand Slam vawi 19 champion tawh Federer-a'n Philipp Kohlschreiber chu 6-4, 6-2, 7-5 in a hneh. Swiss star hian an match hmasa pahnihah set nga a khelh a ngai a, match hnuhnung pahnihah erawh set a hloh tawh lo. German tlangval Kohlschreiber phei hi chuan Federer lakah break point pawh a hmu eih lo - kum 36 mi Federer a la tar lo e.

US Open nomawi panga nei tawh Federer chuan, "Ka hnungzâng na ka ngaihtuah deuh a, kha vang khan set hnihna kan zawh hnu khan medical time out pawh ka lak phah. Mahse, hliam na a ni lo a, ka khingpui kha innghahtir ka duh loh avangin a rang thei ang berin court chhungah ka kir leh," tiin a sawi.

World number 3 Federer hian Del Potro a hneh a nih chuan Nadal a hmachhawn leh dawn a, semifinal a paltlang a nih chuan kum 2012 November thla hnua a vawi khat nan world number 1 a ni leh ang.

Inkhel Thlirna Tawi
Nadal Stats Dolgopolov
4 Aces 7
2 Double Faults 2
44/63 (70%) First Serve 5 In 51/86 (59%)
5/7 (71%) Net Points Won 7/14 (50%)
6/13 (46%) Break Points Won 0/2 (0%)
23 Winners 25
11 Unforced Errors 39
89 Total Points Won 60
4854.8 Distance Covered 4219.6
Inkhel Thlirna Tawi
Federer Stats Kohlschreiber
11 ACES 4
2 Double Faults 2
49/75 (65%) First Serve % In 55/96 (57%)
15/20 (75%) Ner Points Won 9/14 (64%)
4/7 (57%) Break Points Won 0/0 (0%)
39 Winners 19
20 Unforced Errors 33
101 Total Points Won 70
5027.2 Distance Covered 5209.4