England chhandamtu Marcus Rashford

FIFA World Cup 2018 khel turin England-in vawi khat chak chiah an mamawh ta - Three Lions (England sawina) hian Thawhṭanni zan khan goal an chhuah hmasak zet hnuah Slovakia chu 2-1 in an hneh a, vawi hnih chiah khelh tur nei tawhin vawi khat an chak leh chuan an inpet tling ang.

England tan player ṭha rual kara hming langsar ber chu rawlthar Marcus Rashford a ni - a tihsual leh chet ṭhat a larpui! Manchester United forward hian a ball hloh vanga si an phurh hmasak zet hnuah Eric Dier-a goal khung tur a siamsak a, chakna goal a khung zui bawk.

Hero to Zero

Wembley Stadium-a inkhelah ṭan aṭanga minute thumna lekah mikhual team-in goal an khung hmasa a, Stanislav Lobotka chuan England fan-te a barakhaih. Three Lions goal chhuah chhanah mawhpuh tur an awm a nih chuan Rashford chu puh tur a ni a, United rawlthar hian Lobotka a venna kawngah a tih tur a ti tawk lo a, inkhelah a rilru a pe tawk lo niin a lang.

Kum 19 mi lek a ni a, World Cup qualifier boruak sang takah a chetsual bawk avangin 'naupang' Rashford hi tho leh tura ngaih a ni tawh lo. Mahse, United forward hian rilru huaisen a nei tih pholangin minute 37-naah corner a pet a, Eric Dier chuan goal-ah a lo chantir. Chawlhlawk hman a nih hnuah pawh Rashford-a'n a huaisenna a lantir chhunzawm a, minute 59-naah cial zetin goal a khung.

England dinhmun

Three Lions-in hnehna an chang ngei a, an result hi lawmna tur ni mah se an khelh danah erawh lawmna tur a vang hle. Group F-ah point ngaa hma hruai fal chunga match khat chak chiah an mamawh tawh avangin World Cup an khelh ngei a beiseiawm a, an tana theihnghilh thiang lo erawh an group-ah 'world class' tia sawi tur an awm lo.

England hi Slovakia, Slovenia, Scot­land, Lithuania leh Malta te nen an awm hoin tlawm hmel an la hmu lo a, fiahna tak tak an la hmachhawn loa ngaih a ni - World Cup-ah thlen san an tum dawn a nih chuan tun aṭanga team an insiam-

ṭhat a pawimawh ang.

Southgate thukhawchang

England manager Gareth Southgate chuan, "Inkhel bul kan ṭan ṭha lo a, mah se ka player-te an insiamṭhat leh thuai avangin ka lawm hle. Ka nau ten an khelh danah fak an phu a, Slovakia kha kan game-ah kan hruai lut a ni," a ti.

Southgate chuan Rashford fak nghalin, "Rashford khan a theihna zawng zawng a pholang a ni. Hmasawnna tur chu a la nei ngei a, mah se a ball ken dan leh boruak sang tak kar pawha a zam lohna khan stadium-a mipui thlengin a ti phur a ni," a ti a, United rawlthar chu a chhuang hle.

Scotland beiseina

England-in Slovakia laka hnehna an chan avangin an ṭhenawm ram Scotland tan hna ṭha tak an thawhsak tel nghal. Scotland hian an mikhual Malta chu Christophe Berra leh Leigh Griffiths goal khung hmangin 2-0 in an hneh a, pahnihna Slovakia hi point khat chiahin an phak lo tawh.

Scotland vanneihna belhchhahtu chu match hnih chiah khelh tur an neih tawhah Slovakia leh an point hmuh ang zat hmu Slovenia an la hmachhawn dawn - ram pahnih hi an hneh ve ve theih a nih chuan playoff khel turin an inpet tling thei dawn tihna a ni a, Group F ngaihnawmna chu heng ram pathumten beiseina an la nei vek hi a ni.