Mbappe-a'n fans chungah thupha a chawi

Paris St-Germain zawmtu Kylian Mbappe chuan an elpui club a zawm avangin AS Mona­co fans thinrimna chu a hriatthiampui thu a sawi a, thupha a chawi bawk.

Kum 18 mi Mbappe hian season hmasa khan inelna hrang hrangah goal 24 khungin Monaco chu kum 17 hnua a vawi khat nan French Ligue 1 nomawi a chawipui. Rawlthar beiseiawm hi PSG-in loan hmangin an lalut a, a loan hun a zawh hnuah pound maktaduai 166-in a nghetin an lalut thei ang.

France international hi a club tan tun season league match hmasa berah bak a la inlan lo a, an match hnuhnung bera Marseille 6-1 zeta an sawp ṭum pawhin bench-ah dah niin Monaco fans ṭhenkhat chuan an auel hial.

Mbappe chuan, "Ka duhthlanna hi mi ṭhenkhat chuan an hrethiam loin an thinrim tih ka hria, a awm pawh ka tih pui tho. Min aunawmnah pawh kha mak ka ti lo, ka chungchangah thu dik tawk lo thehdarh a nih ṭhin vang a ni. Monaco fans chetdan kha ka dem lo a, ka hmuhdan leh ngaihdan chu a la pangngai reng,"

"Min au nawmnahin min auel vel pawh ni ula in chunga ka rilru put­dan a pangngai reng - ka hmangih che u," tiin Twit­ter lamah a tarlang a ni.