Tu nge Liberian player nei ṭha zawk? Chanmari FC Vs Aizawl FC
Mizoram Premier League Season 6 hi foreign player tam ber ṭum a ni a, Zirtawp zan hian Chanmari FC-in an Liberian striker Alex Whittemore an pho chhuak ang.
MPL champion lai Chanmari FC hian an match hnihnaah Aizawl FC an hmachhawn dawn. I League champion hian Liberian midfielder Alfred Kemah Jaryan an nei ve bawk - ṭhian dun an ni nghe nghe.
I League best midfielder Alfred leh Whittemore-te hi an position inang lo mah se an ram an inan avangin khaikhin theih an ni.
Chanmari FC coach H. Vanlalthlanga chuan, "Dinthar FC kan hneh hnu khan vawi khat chiah training kan la nei a, kan vanduai hle. Hei vang hian kan striker thar Alex hi vawi khat chiah kan la tihpui theih a, Liberian striker theihna tak tak hi a la hriat theih loh," tiin Vanglaini a hrilh.
Training vawi khatna aṭanga a hmuh dan sawi zuiin Thlanga hian, "Kan game kalhmang a hre thiam a, harsatna a nei lo. Striker fing tak a niin ka hria a, a chevelah pawh a lungawi thlak hle. Foreigner hi lak sual awlsam tak a ni a, Alex Whittemore hi chu a fuh dawnin ka hria. A position-ah midang kan neih loh avangin Aizawl FC nen pawh bul a ṭan nghal ang," tiin Zirtawp zanah a inlan ngei tur thu a sawi.
Alex Whittemore hi Liberia national football team tan pawha khel tawh nia sawi a ni a, Aizawl FC midfielder Alfred nen inṭhian ṭha tak an ni.
Mizoram baka India ram hmun danga tawnhriat nei ṭha tawh Alfred hian MPL4-ah khan goal kua a khung a, chung zinga goal hnih chu final-a Chanmari FC an hneh ṭuma a khung a ni. Hetihlai hian Liberian player hian forward position-ah a khel ṭhin.
Kum 28 mi Alfred hi MPL5-ah a inlan lo a, I League-ah erawh Aizawl FC-ah rawn kir lehin Khalid Jamil-a'n a theihna hriain midfield-ah a sawn let a, a tifuh hle - I League best midfielder niin Aizawl FC champion-na kawnga captain leh khaipa a ni.
Zirtawp zan hian Lammualah AFC midfielder Alfred-a'n Chanmari striker thar Whittemore a veng dawn a, MPL final-a vawi hnih intawng tawh team inkhel tingaihnawma tihmuhnawm zualtu tur a ni.