World champion Germany la chak vek

Russia-in FIFA World Cup an thlen hunah champion lai Germany an tel ngei dawnin a lang. Die Mannschaft hian Thawhṭanni zan khan Norway 6-0 in an sawp a, qualifier group C-ah match riat khel tawhin an la chak vek.

Joachim Low hote hian anmahni hnaih bertu Northern Ireland leh pathumnaa awm Azerbaijan an la hmachhawn ang.

Goal ruk chu

Mercedes-Benz Arena, Stut­tgart-ah Germany tan Mesut Ozil-a'n minute 10-na lekah goal a khung a, Julian Draxler-a'n minute sarih hnuah a khung chhunzawm a, RB Leipzig striker Timo Werner-a'n first half-ah vek goal hnih (21', 40') a khung belh. Second half-ah substitute Leon Goretzka (50') leh Mario Gomez (79) ten goal hnih dang an khung belh leh bawk.

Germany coach Joachim Low chuan, "Hun rei tak hnuah mahni mualah kan khel a, mipui pawhin an ram team inkhel en an châk tih a lang a ni. Player-ten khelmualah goal hmangin mipui an tiphur a, kan khel kha hmuh a nuam hle," tiin an khelh danah a lungawi thu a sawi.

Low chuan sawi chhun­zawmin, "Czech nena kan khelh zawh khan kan rilru put hmang thlak kan mamawh a, Norway nen chuan engkim a danglam. Ka tuk lawk leh ka duh ang takin goal khung turin kan pet hnem a ni," a ti. Die Mannschaft hian goal ruk khung tur hian vawi 28 goal attempt an nei a ni.

Playoff-ah N Ireland?

Northern Ireland-in World Cup beiseina nei chhunzawmin turin West Brom player pahnih Jonny Evans (28') leh Chris Brunt (41') te goal hmangin Czech Republic 2-0 in an hneh.

Windsor Park-a hnehna an chan chiah hian Michael O'Neill-a hote hi a zawna vawi nga an chakna chiah a ni a, Northern Ireland history-a an chak zawn rei ber ṭum a ni.

Euro 2016-ah khan Nor­thern Ireland hi an inlan a, van­neih vanga ngaih a ni. Amaherawhchu, World Cup qualifier-ah pahnihna dinhmun an hauh a, hmahruaitu Germany an phak lohna point nga ni mah se anmahni hnaih bertu Azerbaijan aia point kua an san avangin pahnihna an ni chiang tawh.

World Cup Qua­lifier-ah hian Europe ram 54 chu group kuaah pariat ṭheuha sem darh an ni a, group hmahruaitu bakah hian pa­hnihna pariatin Russia an pan dawn. Nor­thern Ireland hian Germany leh Norway an la hma­chhawn dawn a, playoff an khelh ngei a rinawm.

Hmahruaitu Poland

Poland-in Group E hma­hruaitu ni turin Kazakhstan 3-0 in an hneh a; Arkadiusz Milik, Kamil Glik leh Robert Lewandowski ten goal an khung.

Mak takin Poland hi Zir­tawpni zan khan Denmark-in 4-0 in an sawp a, hei vang hian World Cup ticket nei chiang turin Armenia leh Montenegro an hmachhawn hunah point li tal an hlawhchhuah a ngai dawn a, hmabak hau tak tih tur chu a ni tawh lo.

Pahnihna leh pathumnaa awm Montenegro leh Poland ten an khingpui Romania (1-0) leh Armenia (4-1) in an hneh ve ve a, ram pahnih hian point 16 ve ve an hmuh bakah an goal difference leh an goal khung zat thlengin a inang. Playoff inchuhna boruak a sang dawn a, October 5 zanah hian Montenegro-in Denmark an mikhual dawn a, hetah hian team dinhmun tur a hriat fel theih a rinawm.