World XI tour Pakistan tan a ṭha - Collingwood

September 12, 13 leh 15-ah World XI tia hming an pek cricketer langsar ten Pakistan nen Lahore khawpuiah Twenty20 series an khel dawn a, World XI zinga tel tur Paul Collingwood chuan an inkhel tur chuan Pakistan cricket-ah hmasawnna nasa tak a thlen a beisei thu a sawi.

Kum 2009 khan Sri Lanka team chuanna Bus chu Lahore khawpuiah hian beih a ni a, he thil thlen hnuah hian cricket ram langsar ten Pakistan-a inkhelh an duh tawh lo a, kum 2015-a Zimbabwe an zin kha Pakistan-a cricket ram an zin leh awmchhun a ni. Pakistan hian United Arab Emirates leh England-ah an home match an khel ṭhin.

Collingwood chuan, "Pakistan tan chuan an khelmual ngeia home match khelh leh phahna remchang a ni dawn a, chutihrual chuan hmabak erawh a la awm ang," tiin a sawi a, thawklehkhata cricket ram langsar te rilru puthmang thlak thut theih erawh a inbeisei lo.

England tana ODI match 197 inlantu chuan, "Pakistan puih tum hi kan tih tur a ni a, hei hi cricket tan a ṭha a ni. Kan pawisa hlawh tur hi a tam tih phat rual a ni lo a, mah se an khelmual ngeia Pakistan hmachhawn leh hi minti phurtu a ni," a ti.

World XI hi Pakistan Cricket Board-in an thlan an ni a, Indian player an tel lo. Player mal tin hian he squad-a an awm avang hian $100,000 ṭheuh an hlawh thei dawn a ni.

World XI squad: Faf du Plessis (captain, South Africa), Hashim Amla (South Africa), Samuel Badree (West Indies), George Bailey (Australia), Paul Collingwood (England), Ben Cutting (Australia), Grant Elliott (New Zealand), Tamim Iqbal (Bangladesh), David Miller (South Africa), Morne Morkel (South Africa), Tim Paine (wicketkeeper) (Australia), Thisara Perera (Sri Lanka), Imran Tahir (South Africa), Darren Sammy (West Indies).