Ramhlun North nge ṭantu ngah dawn Dinthar?

Mizoram Premier League Season 6-ah nomawi duhin player ṭha an seng lut vek a, tunah chuan transfer hun khar a nih tawh avangin MPL club inelna tura pawimawh chu ṭantu neih ngah lamah a ni.

Player 12-na an tih mai, supporter hian inkhel result a tihdanglam phak avangin zanin dar 7:30-a inkhel tur Ramhlun North FC leh Dinthar FC te pawh hian ṭantu neih tamah an inel tel ang.

En châkawm

Dinthar mipui tan chanchin ṭha hriat nuam a, Nigerian striker Jackson Victor Ogheneochuku hremna hlihsak a ni.

Maimawms-in Chanmari FC an hneh loh ṭum­­in Nigerian midfielder Cla­rence Carter chhantu a hnam­pui Jackson chu mak takin referee-in a hnawt chhuak. MFA disciplinary committee-in a rel hmasak ṭumin hremna kal tlang turin rel mah se video ṭha zawk nen Dinthar FC-in ngenna an thehlut nawn a, Jackson-a chet mawi lohna hmuh a nih loh avangin Nigerian forward hian zaninah Ramhlun North a hmachhawn thei ang.

Ramhlun North-in match hmasa bera Aizawl FC nen an inhnehtawk ṭumin Liberian midfielder Harry Delona Morris Jr chu minute 79-naah chiah an chhawr ngam a, zaninah chuan inkhel bul a ṭan tawh ang.

Coach Samson Ramengmawia chuan, "Tunah chuan training a chhim tam tawh a, Mizo player-te nen pawh an innel tawh. Inkhel bul ṭan turin a inpeih tawh," tiin Vanglaini a hrilh.

Harry hi palian ni lo mah se I League champion Aizawl FC laka hun rei lote chhung a inlanah pawh a theihna a pho­­lang tawh a, Dinthar FC mid­­fielder Clarence nena an inveng tur hi a hmuhnawm khawp ang.

Notea a nung

Ramhlun North tana MPL6-a goal khung thei awm chhun Lalliansanga (Notea) hi a chet ran avangin dang­lam thlen thei player a ni a, Durtlang tlangval chawm tur hian midfielder ball thiam Lalramzauva leh Lalrinfela te an awm avangin Samson-a hote goal nawr hi a na ang.

Dinthar coach Lalhlupuia Sailo pawhin, "Notea hi kan ven uluk ṭul a, chutihrualin an team pumpui kha an thawhrim avangin point thum hmu tur chuan kan thawhrim ve a ṭul ang. Chak theihna tur niin ka hria," tiin inkhel tur chungchang a sawi.

Maimawms lamin hrem vangin Zothanzuala an chhawr thei dawn lo a, Armed Veng tlangval aiah rawlthar duhawm Lalbiakzuala a luh hmel.

Dinthar FC-in an match hmasa berah goal an khung lo a, an goal chhuah pawh player 10-a an khelh hnuah chiah a ni. Lalhlua hote hian an match hmasa berah chak loh chhuanlam ṭha tak nei mah se point an la hmu lo a, point hi a pawimawh ber a ni lawi si.

Zanin hian point thum la hmu lo team pahnih chak tumin an inkhel dawn a, a hmuhnawm ang.