Alexis Sanchez-a'n sawiselna a ning

Alexis Sanchez chuan tun hnaia a chanchin sawi tam lutuk chuan a tih nguai thu a sawi chhuak. Arsenal forward hi club leh ram tan beisei angin a khel thei rih lo a, sawiselna karah a leng mek.

Chile international hian Gunners chhuahsanin Manchester City a zawm hman teuh hle a, nipui bazar tawp zanah club pahnih inbiakna a tlawlh vang chauh a chhuak lo a ni. Sanchez hian tun season-ah a club tan Premier League match khat chiah a la khel a, a inlan ṭum hian Liverpool lakah 4-0 in an tlawm.

World Cup qualifier lamah pawh Sanchez hian an ram a chetṭhat pui thei lo a, an match hnuhnung berah Bolivia 1-0 in an ngam lo a, South America ram 10 inel zingah parukna an ni mek.

Kum 28 mi Sanchez chuan, "Chhan hrang hrang vangin sawisel ka ni a, ṭhenkhat chuan chhan nei lem loin ka chanchin ṭha lo lai an sawi ve bawk, thu lengvak tam lutuk vang hian a chauh theih. Sawiselna leh chak lohna kan tawh zawh chiah hian tho chhuak leh tura infuih thar a ngai ṭhin," tiin a sawi.

Arsenal hian league match thum khelh tawhah vawi khat bak chak ni hmel an la hmu lo a, Inrinni zan hian Emirates Stadium-ah Bournemouth an mikhual ang.