NE Zone Badminton C'ship Senior Team-ah Manipur 1-na; Mizoram 2-na

North East Zone Inter State Badminton Championship chu nimin khan R. Dengṭhuama Hall, Aizawlah khelh chhunzawm a ni a, Mizoramin final thleng mah se Manipur an hneh loh avangin National Championship-ah an inlan thei dawn lo.

Vawiin hian open inelna ṭan a ni dawn a, North East badminton khawmpui lian hi Zonet Cable TV-ah live-a pekchhuah a ni.

Senior Mixed Team inelnaah Mizoramin final lut turin Arunachal Pradesh an hneh hnuah nimin khan Sikkim 3-0 in a sawp. Final thlir lawk ranin men's singles-ah M Joseph a rawn inlan a, Sikkimese shuttler Amon Rai chu 17-21, 21-9, 21-18 in a hneh.

Women's singles-ah Lalrin­zuali'n harsatna a tawk lo a, men's doubles-ah Lalmuanawma leh Lalduhawma (Lalmama) ten awlsam takin an khingpui hneh bawkin Mizoram 3-0 in an chak. Semifinal pakhat zawkah Manipur-in champion lai Assam chu 3-2 in an hneh hram.

Final-ah men's singles-ah Mizoramin Samuel Lalnunmawia an thawh chhuak a, amaherawhchu Manipur chhuanvawr M. Meiraba Luwang lakah 21-17, 21-18 in an chak lo. Women's singles-ah Maheshwari Dev-i'n Mizo nula Zuali chu 21-12, 21-12 in an hneh leh bawk.

Match thumnaah Manipur-in men's doubles-ah India Under 19 champion K. Dingku & K.H. Manjit rawn dahin 3-0 in hnehna chan an tum a, amaherawhchu tawnhriat nei ṭha Lalmuanawma leh Lalmama ten 21-19, 21-16 in hnehna an chang.

Mizoramin North East cham­pion ni turin beiseina nei hman mah se Hriati leh Zuali te inkawpin Maheshwari Devi leh N. Purnima te inkawp chu 21-16, 21-15 in an ngam lo. Manipur chu North East champion thar an ni a, National C'ship khel turin an tling.

Junior Mixed Team-ah Mizo­ramin Assam an hneh lo a, nizan khan Assam leh Manipur ten final an khel a, result kan hre hman lo.