Rep of Ireland an tawlhthlu, Wales an fei

FIFA World Cup qualifier-ah Republic of Ireland-in an mualah player 10-a khel Serbia an hneh lo a, Wales-in khualmualah Moldova 2-0 in an hneh ve bawk. Group D-ah Serbia-in hma an hruai chhunzawm a, Rep of Ireland erawh pathumnaah tla thlain Wales pahnihnaah an lawn chho thung.

Inkhel pawimawh 2

Dublin-ah Serbia tan Man­chester City defender hlui Alek­sander Kolarov-a'n minute 55-naah a khung a, minute 68-naah Serbia player Nikola Maksimovic chu hnawhchhuah ni mah se mualneitu Republic of Ireland an tho chhuak thei lo.

Wales-in FIFA ranking-a anmahni aia 141 zeta hniam Moldova lakah goal khung an harsat a, minute 10 chiah a awm tawh tihin Hal Robson-Kanu hmangin hmahruaina goal an khung a, Aaron Ramsey-a'n injury time-ah chak nemnghehna goal a khung.

Wales tan Ben Woodburn bawk a langsar a, Liverpool rawl­thar hian a thiamna hmangin dang­lamna a thlen. Kum 17 mi Wood­burn hian Austria laka chakna goal a khung hnuin Robson-Kanu khung tur hi a siam sak a ni.

Engtin zel?

Match hnih khelh tur la awmah Serbia-in Austria leh Georgia an hmachhawn dawn a, tling chiang tura an mamawh zat point thum hmuh an harsat lo ang.

Wales leh Rep of Ireland hian Georgia leh Moldova an hmachhawn hnuah an pahnih hian qualifier match hnuhnung ber an khel dawn. Cardiff-ah October 9 zanah an inkhel ang a, hei hi playoff khel tur zawnnaah a ngaih theih ang.

Eng nge an sawi?

Republic of Ireland Martin O'Neill chuan, "Match hnih khelh tur kan la nei a, beisei tur kan la nei a ni. First half-ah khel ṭha takzet a, second half-a goal ho taka kan chhuah vang khan beisei ang result kan hlawhchhuah loh phah a ni," tiin a sawi.

Wales manager Chris Cole­man chuan, "A phurawm khawp mai. Duhthusam ang chuan thleng se Dublin-ah khan Serbia-in point khat chiah hlawh chhuak se, point thum an hmuh takah chuan an kutah engkim a awm tawh. Keini pawhin playoff hmangin World Cup kan la khel thei a, Russia ram pan hrim hrim hi kan duh a ni," tiin World Cup thlen ngei an tum thu a sawi.