Ram buai Syria World Cup beiseina a la nung
Asia khawmualpui aṭangin 2018 FIFA World Cup khel turin Iran, South Korea, Japan leh Saudi Arabia te an tling tawh a, playoff hmanga hmunruak chuh turin Syria leh Australia ten beiseina an la nei bawk. Kum ruk leh thla nga chhung tualchhung indona vanga ram buai Syria-in World Cup beiseina an la nei hi chanchin chhinchhiahtlak a ni.
Syria hian Thawhlehni khan hneh loh la tawng lo Iran hmachawn turin Tehran an tlawh. Real Madrid manager hlui Carlos Queiroz hote hian match hnuhnung pakuaah goal chhuah lo mah se group match hnuhnung berah hian minute 13-na lekah goal an chhuah a, World Cup khelh tuma theihna zawng zawnga khel Syria tan Tamer Haj Mohamad-a'n a tauh lut.
Asia aṭanga World Cup khel tura tling hmasa ber Iran-in Sardar Azmoun goal hnih hmangin an lehthal a, amaherawhchu Syria beiseina neih a ti mit pha lo. Syria hian an huaisen rah sengin injury time-ah Omar Al Somah hmangin an siphurh an sut.
Inkhel dangah South Korea leh Uzbekistan te goal awm loin an inhnehtawk a, hei vang hian Uzbekistan aia goal difference nei ṭha zawk Syria-in playoff an khelh theih phah. Syria hmabak erawh a la ko a, Australia nen October thlaah playoff an la khel dawn a, hnehna an chang a nih pawhin CONCACAF palina nen playoff khelh a la ṭul dawn.
Syria hian Russia ram hi an thleng pha lo a nih pawhin tuna an thlen chin hi a ropui hle. Tualchhung indona kum ruk chuang an hmachhawn tawh avangin football team hian pawisa an tlachham a, ram mipui ṭhahnem takin thinlung takin football team hi an ṭan a, politics vanga buaina chunga football hmanga hlimna hi suma lei theih a ni lo.
Syria team thawhona hi a ṭha a, an thil tawn hi an harsatna ngaihtuah chuan thleng thei lo hiala ngaih theih a ni. An home match hi Malaysia-ah daih an khel a, hei vang hian an zinkawng thui phah mah se an khelhna hmun apiangah huaisen takin an khel zel. Iran nena an inkhelh ṭum pawh hi an khawpui Damascus-a Al-Jalaa Stadium aṭangin mipui sang chuangin an en a ni.