American tlangval an tla kim

US Open khelh mekah mipa singles player-ten beisei an phak lo. Nimin zing khan Sam Querrey chu Kevin Anderson hneh loin quarterfinal aṭanga vuak tlak a ni a, tualchung tlangval an tla kim chiah.

Arthur Ashe Stadium-a inkhelah South African tlangval Anderson-a'n darkar thum leh minute 26 chhungin 7-6 (7-5), 6-7 (9-11), 6-3, 7-6 (9-7) a hnehna changin a vawi khat nan Flushing Meadows-ah semifinal a khel dawn.

Feet ruk leh inches riat zeta sang Anderson chuan, "Khawvela tennis court hmingthang leh ṭha ber pakhatah khawtual tlangval ka hneh thei a, ka tan chuan ni chhinchhiah tlak bik tak a ni," tiin a sawi.

Seeded 28-na Anderson hian final lut tur chuan Pablo Carreno Busta a paltlang leh phawt a ngai ang. Quarterfinal dangah Carreno Busta hian Diego Schwartzman chu 6-4, 6-4, 6-2 in a lo hneh ve bawk - Spain tlangval Busta chiah hi tun tournament khelh laia set la hloh lo awm chhun a ni.

Kum 26 mi Busta chuan, "Tun hmain US Open khelh hi ka lo suangtawh tawh ṭhin a, tunah chuan a takin a thleng pawh a ni satliah tawh lo, semifinal hial ka thleng thei hi ka lawm hle a ni," a ti.

Semifinal-a inhmachhawn tur Anderson leh Busta te hian US Open semifinal vawi khat an khelhna tur ve ve a ni a, an tan chuan an thlen chin apiang hi history a ni chho zel tawh.