Chuai thei lo Venus-i'n semifinal lut

American nula Venus Williams chuan a vawi 23 nan Grand Slam semifinal a inhlangkai leh ta. Kum 37 mi Venus hian Petra Kvitova lakah 6-3, 3-6, 7-6 (7-2) a hnehna changin US Open semifinal a lut a, final lut turin a hnampui Sloane Ste­phens a paltlang leh a ngai dawn a ni.

Arthur Ashe Stadium-a quar­ter­final inkhelah Grand Slam champion tawh pahnih Venus leh Kvitova te an inkhing tawk hle. Player pahnihte an vawi ruk intawnna a ni a, chak zawk hre turin set thumnaah tie break khelh a ngai hial. Darkar hnih leh minute 35 an inkhelh hnuah seeded pakhuana Venus hian hnehna a chang.

Kumin US Open-ah hmeichhe player langsarin beisei an phak lo hle. Singles player quarterfinal lut zingah Venus leh Kvitova te chiah hi major title nei an ni a, player dang tan erawh an champion thei hlauh a nih chuan an Grand Slam nomawi hmasa ber a ni ang.

Grand Slam vawi sarih cham­pion tawh Venus chuan, "A tawpa vannei zawka ka ṭang kha ka lawm takzet. Kvitova kha khelh a harsa hle a, a chang kha chuan min lehthal lek lek reng a ni. Tun ṭumah hian US player kan che ṭha tlang hle a, semifinal-ah pawh khawtual player a tam thei ang ber lut ila tih hi ka duhthusam a ni," tiin a sawi.

A khingpui Kvitova fakin Venus chuan, "Hliam na tak a tawrh hnua a rawn kir leh thei hi ka lawmpui a, a ball rawn vuak ṭhenkhat kha chuan min barakaihah thei hle. Player ṭha tak a rawn kir leh avang hian match ropui zawk pawh kan la khelh leh ka beisei," a ti.

Venus lakah chak lo mah se kum 27 mi Kvitova tan US Open quarterfinal thlen hi result chhia a ni lo. Wimbledon vawi hnih champion tawh Kvitova hi nikum December thla khan Czech Republic-a a chenna inah chemte hmanga beih a ni a, tennis a khelh thiamna ban vei lam hliam hi zai niin thla nga chhung a inkhelh theih loh tun hnaiah a rawn kir ve leh chauh a ni.

Seeded 13-na Kvitova hian US Open quarterfinal a vawi hnih khelhna a ni a, kum 2015 khan Flavia Pennetta hneh loin a zinkawng a lo tawp tawh. A hliam dam hnuah French Open leh Wimbledon-ah inlanin second round bak a thleng zo lo a, season khat chhunga inelna lian hnuhnung berah erawh a thiam pariat zingah a inhlangkai thei leh tawh.

A vawi khat nan

Hmeichhe singles quarterfinal inkhel dangah American nula Sloane Stephens chuan Anastasija Sevastova hnehin a vawi khat nan US Open semifinal a lut. Hliam dam hlim Stephens hi world number 83-na niin beisei phak bakin tun tournament-ah hian a khel ṭha, Latvia nula Sevastova lakah hian 6-3, 3-6, 7-6 (7-4) in hnehna a chang - set hnuhnung ber bikah hian 3-1 zeta a hnufual hnuah a khingpui hi a lehthal leh thei a ni.

Kum 24 mi Stephens chuan, "Wimbledon aṭang khan ka inkhel thei ve leh ṭan chauh a ni a, hetiang dinhmun ka thleng leh nghal thei hi a mak ka tiin min ṭantute chu an lungchhiat zawk hial ka ring. Chhel tak leh huai taka awm turin ka infuih ṭhin a, ṭha leh ngelnghet taka khelh reng theih hi ka duhthusam a ni," tiin a sawi.

Stephens hian kum 2013 khan Australian Open semifinal a khel a, hemi hnuah a ke phah hliam vangin a inkhel tam loin beisei a phak lo bawk. Thla 11 zet a inkhelh theih loh avangin world ranking-ah pawh 957-naah a tla hniam hman a, tun hnai thla hnih chhung lekin world number 213-naah rawn inhlangkaiin US Open semifinal a thlen vang hian ranking chhuak tharah chuan a sang 50 zingah a tel phak ang.