Police tum a châkawm loh - BVT coach

Mizoram Police-in Chhinga Veng laka goal an khung hmasak hnuah goal li an chhuah a, vawiin tlai dar 3:00 hian Lammualah MPL6 match hnihnaah Bethlehem Vengthlang FC an hmachhawn leh ang.

BVT coach Chawngthansanga chuan, "Tun hi Police khelh harsat lai tak tur a ni a, anni tum hi a châkawm loh," tiin an khingpui tur team chungchang a sawi.

Police hi MPL1-ah champion thei tura ngaih an ni a, pahnihna ni chunga season an khar hnuah beisei an pha lo chhunzawm zel. MPL4-ah Police hi an relegate-a season khat chhung Aizawl DFA hnuaia first division an khelh hnuin kuminah MPL an rawn khel leh a, minute 90 chhung khelh ṭhat an harsat tawh.

Hemi chungchang hi sawiin Chawnga chuan, "Police hian player an nei ṭha a, amaherawhchu game rang tak khelhna MPL khel tur chuan an kum a tam ve deuh tawh niin a lang. Minute 90 chhung ṭha taka kan khelh theih chuan point thum kan hlawhchhuah theih ka beisei a, amaherawhchu MPL match hrim hrimah chuan chak turin theihtawp chhuah a ṭul a, eng team mah dah hniam theih a ni lo," tiin Vanglaini a hrilh.

BVT hian hrem vangin defender Vanlalzuia an la chhawr thei dawn lo a, Police-in an midfielder pawimawh V. Lalṭanpuia an chhawr thei tawh dawn a, an midfield a phui sawt ang.

Ṭialthawnga hoten match hnih khelh zawha point hmu lo bik nih an duh dawn avangin tlai inkhel hi a entlak khawp ang.