Argentina leh Chile dinhmun a him lo
World champion vawi hnih ni tawh Argentina leh Copa America champion ni lai Chile te chu nakkum FIFA World Cup khel lo thut thei dinhmunah an ding mek. Nimin zing South America World Cup qualifier inkhelah Argentina an chak zo lo a, Chile pawh Bolivia lakah an tlawm ve bawk.
A bilh a tho lo
Argentina-in result ṭha an neih theih loh vangin coach an ban a, a thlak nan Sevilla manager hlui Jorge Sampaoli an lalut. Sampaoli kaihhruaina hnuaiah friendly match lamah result nei ṭha mah se inelna tak an hmachhawn tawh match hnihah chak ni hmel an la hmu lo - table mawng phaha awm Venezuela nen 1-1 in an inhnehtawk.
Buenos Aires-a inkhelah hun chanve hma lamin goal a lut lo a, minute 50-naah mikhual Venezuela tan defender Jeison Murill chuan goal hmahruai khungin minute li a liam hnuah central defender Rolf Feltscher chuan an mahni lamah a ti lut palh, Lionel Messi leh a ṭhianten goal dang an khung belh thei lo.
South America ram 10 inel zingah Argentina hian point 24 hmuin table-ah pangana an ni, palina chin hi Russia panna theihna ticket nei nghal tur an ni - pangna tan playoff khelh a ngai dawn. Match hnih khelh hmabak an la nei a, an chung chiaha awm Peru an mikhual dawn bakah inkhelh harsatna hmun Ecuador an la pan dawn bawk.
Argentina coach Jorge Sampaoli chuan, "First half-ah goal khung theihna hun ṭha vawi thum kan neih kan hmangṭangkai thei lo a, kan tuar zui ta a ni. Kan hma bakah Peru leh Ecuador te chiah an awm tawh a, hnehna kan chan ve ve a ngai ang. Goal khung ngei tumin kan chak lohna lai kan in ennawn leh ang," tiin a sawi.
Chile buai zel
Chile coach Juan Antonio Pizzi chuan, "Inkhelh hmabak pahnih chiah kan nei ta, kan sual chhuah ngei a ngai. Thil thleng thei zawng zawng kan thlentir a ngai tawh dawn a, keiman bul ka ṭan anga, ka player ten huaisen takin ka hnungah min zui a ngai bawk ang - kan bei dawn a ni," tiin Bolivia 1-0 a an hneh loh hnuah a sawi.
A zawna Copa America champion thei Chile hian point 23 hmuin table-ah parukna an ni mek a, Russia pan tur chuan an hmabaka hnehna chan bakah an chunga mite an chetsual a ngai tel tawh. Pizzi naute hian Ecuador bakah hmahruaitu Brazil an la hmachhawn ang.
Inkhel dang
Nimin zing inkhel dangah Uruguay chuan Federico Valverde leh Luis Suarez te goal hmangin Paraguay 2-1 in an hneh a, table-ah pahnihna niin an dinhmun an siamṭha tawh hle.
Uruguay tan hian Argentina nen an inkhelh ṭuma hliam tenau tuar Suarez a inlan zui thei. Barcelona striker hian goalkeeper Anthony Silva a virkual khum hnuah crossbar a pet per a, ball rawn let leh chu Paraguay player-in an mahni lamah a ti lut.
Brazil lamin Willian hmanga goal hmahruai an khung chu Colombia tan striker Radamel Falcao chuan sutin 1-1 in an inhnehtawk. Tite naute hi tling chiang tawh an ni a, an result hian an dinhmun a khawih danglam phak tawh lo. Coach Tite chuan player ṭhenkhat khel ṭha hle mah se a ṭhenin beisei an phak lo a, a bik takin Roberto Firmino lakah beiseina sang zawk an neih thu a sawi zui.
Tite chuan, "Firmino hian a theihna tak a la pho chhuak lo a ni. A khel chhia a ni lo a, chutih laiin kha aia ṭha khan a la khel thei a ni," a ti. Liverpool forward hian Premier League club tan tun season inelna hrang hrangah match nga a khelh aṭangin goal thum a khung a ni.
Brazil coach chuan sawi zawmin, "Colombia hian player ṭha an ngah a, a bik takin an tlarhma lam an hlauhawm hle. Goal khat chauh kan chhuah kha kan vannei hle, chutih rualin kan match hnuhnung zawkah Ecuador 2-0 a kan hneh ai khan ka nauten an khel ṭha zawk," a ti.