US dinhmun a la chiang lo

Nakkum FIFA World Cup khelh tum United States dinhmun a la chiang lo. Nimin zing khan US hi an mikhualna ramah Honduras nen 1-1 in an inhnehtawk a, Russia pan tura tling chiang tawh Costa Rica leh Mexico te pawh goal khat ve ve khungin an inhnehtawk bawk.

San Pedro Sula-a inkhelah Houston Dynamo star Romell Quioto-a'n Honduras tan goal hmahruai a khung a, an match hmasa zawkah Costa Rica ngam lotu US an chak lo leh dawn niin a lang hman. US hian hun tawp hma minute nga chiah a awm tawh tihah substitute Bobby Wood hmangin an sut hram.

A zawna World Cup vawi sarih khel tawh US hian point kua hmuin table-ah palina an ni mek a, tuna an dinhmun anga an awm tlang chuan inter confederation playoff-ah Australia emaw Syria an hmachhawn a ṭul ang.

Nimin zing inkhel dangah forward Giovani dos Santos-a'n Mexico tan a match 100-na a khel a, Barcelona leh Tottenham Hotspur player hlui hian an ram chak pui zo lo mah se point khat an hmuh belh avangin table hmahruaitu an ni chhunzawm zel.