Tlai dar 4-ah RG Stadium-ah I Day Football Final rematch ; Police vs Aizawl FC
Zote Honda MPL9-ah vawiin tlai dar 4:00 hian champion lai Aizawl FC leh Mizoram Police te RG Stadium, Mualpuiah an inhmachhawn dawn. Club pahnih hi I Day Football final-ah khan an inhmachhawn a, Police-in 2-0 a hnehna changin kum 2012 hnua a vawi khat nan nomawi lian tham an chawi.
Police hian MPL9-ah tlawm la nei lo mah se vawi khat chiah an la chak a, vawi thum khelh aṭangin point nga an hmu.
I League club Aizawl FC erawhin Bawngkawn tlangval Lalrozama Fanai hnuaiah an khingpui zawng zawng an la hneh vek. Chutihrualin Police hian Chhinga Veng nen goal khat chiah an la chhuah a, Aizawl FC hian goal sarih khung tawhin goal khung tam ber an ni thung.
Standly a rawn ding dawn
Aizawl FC head coach Standly Rozario chuan kar liam ta khan Aizawl a rawn thleng a, I League club hi ṭum hnih training a neihpui tawh. East Bengal, Mohun Bagan leh Shillong Lajong te enkawl tawhtu coach Standly hian Police aṭangin Aizawl FC enkawl hna a ṭan ang.
Standly hi Mizoram football-ah a mikhual lo a, Aizawl FC-in Yan Law an chhawr hma (kum 2019-2021 chhung) khan Mizo club hi a enkawl tawh. MPL hnuhnung bera Aizawl FC champion puitu coach kha a ni a, RG Stadium a ni emaw Lammual emaw pawh ni se Standly hian a hrechiang vek. Chutihrualin Covid-19 hri leng vangin kum hnih chhung MPL khelh theih a ni lo a, Aizawl FC pawh team thar an ni tawh a, Standly-a'n player-te hrechiang turin hun a mamawh dawn.
Aizawl FC boss Standly Rosario chuan, "I Day Football final kha ka lo thlir a, tawnhriat nei zawk Police an vannei ta zawkah ka ngai. Coach Rozama'n hna ṭha tak a thawk a, MPL-ah vawi thumah vawi thum chakin league hmahruaitu kan ni a, player-te pawhin inrintawkna an ngah hle. Rozama hian hun rei tak training a neihpui tawh avangin ani hnen aṭangin thurawn pawh ka la nasa a ni," tiin Vanglaini a hrilh.
Valpuia a dam
Mizoram Police-in match hmasa pathuma squad-a la awm lo F. Lalrinpuia (Valpuia) chu Aizawl FC hmachhawn turin bul an ṭantir dawn. Valpuia hi MPL hmasa bera best forward kha a ni a, MPL4-a Aizawl FC tan a khelh ṭumin mimal chawimawina mi pakhatin a dawn theih ang a dawng vek.
Police coach Lalbiaksanga Colney chuan, "Valpuia a dam tawh a, bul a ṭan dawn. Kan duh chu Aizawl FC chak kaltluang tihtawp hi a ni a, player-te kan fuihna pawh a ni. I Day Football final-a kan hneh kha chu thil hlui a ni tawh a, tunah chuan player pawh an la thar a, team dang daih an ni tawh," tiin chak ngei an tum thu a sawi.
Mizoram Police hian MPL top scorer ni tawh Lalbiakhlua (Biaktea), Lalfakzuala leh Valpuia te bakah MPL best forward ni tawh Malsawmfela te an kawl chungin MPL9-ah goal hnih chiah an la khung a, an goal khungtute hi defender pahnih Lalrinzuala Khiangte leh Lalhmunmawia (Ahmuntea) te an ni.
En châkawm chu
Aizawl FC tlarhnungah captain Lalchhawnkima a awm a, Kim Kima awm hnuah midfielder Lalramsanga a che ṭha sawt bawk. Chutihrualin I League club tlarhnung hi a nghet ṭha bik lo a, match thumah goal thum an chhuah bakah chet fuh tawk loh ṭum an nei bawk. Police tlarhmaten AFC tlarhnung fiahna an nei ang.
I League club hi an squad a chhah ṭha a, a bik takin centre midfield an ngah hle. Midfield laia khel thei Ramsanga,
K. Lalrinfela, Joseph Vanlalhruaia, K. Lalhmangaihkima, KC Larchhuakmawia leh Lalchhanhima Sailo te an kawl a, Police lakah inkhel thunun an tum dawn a ni.
Police-in tlarhnungah Under 18 player Daniel Lalliana an chhawr a, ani hi Ahmuntea nen an inkawm rem hle. BS-a hoten ṭum hnih clean sheet an neih theih nan Daniel-a hi a ṭangkai a, Aizawl FC hmaah a theihna tak tak a hriat theih ang.